“Shuklla kanchik, chikan chikan yuyanchik, shuklla wiñaykawsaytamanta shamunchik, shuk yalalla yachay wasimanta shamunchik, shinami ayllullaktapika rimanchik nirka…”,
Shinami Lenín Moreno, Mallakta Pushak, llankankapa tiyarishpa, Mamallakta Tantanakuypi rimarka.
Shinami wawa manarak wacharikpi, wawa ama wañuchun, wachana wasipi wacharinka, kay “misión ternura” llankayta pushana nirka, kipaman llullu wawa kakpi kuyana nirka. Kay ukupi, kallarik tatkipi chanita, kuyayta, yachayta, sumak rurayta, pukllayta churana nirka, mana pukllay shinalla kachun, ñawpakman payllata alli yarichun wallpana nirka.
Pakta runata tankana
Hatun kamachikkunamanta pakta runakunata amawta yachayta charichun tankana, pachamamata kamachun yachachina nirka. Shina kay runakuna pachamamapak kamachiyta mana washaman shitashpa, runakunapak yachayta mana shitashpa yachachun nirka.
Pakta runakuna paykunapak yachana muskuy charishkata washaman mana shitashun, shinapash sumak yachana wasikunapi alli yachay pusharichun mana kunkarina kan nirka, shina kipaman sumak yachayta charik, paypak yachaywan kushilla runakuna tiyanka, shina runakunata achkata yanapachun mañarka.
Tukuy kawsaypi llankayñan
Kay Plan Toda una Vida ukupi, mayhan sami tisiku unkuyta charik, ancha ukuyta charik, ñalla wañuchik unkuyta charik runakunata kallaripi churashpa yanapana nirka. Yapa wakchayashka aylluman 150 dólar kullkita chayachina nirka, yuyak runakunawan kawsak runaman kullkiwan yanapana nirka.
JLVN/pv/jc-kichwa
