Shamuk kulka puncha Mamallakta Tantanakuypak Comisión de Desarrollo Económico minkashka, sarun rimashka kamachiykunata atinakunka.
“Chaypimi Desarrollo Artesanal kamachiyta rimanakunka, chaypak makirurakkunawan llankankapa tiyarina kan, mushuk kamachiy paykunapak mutsuykunata paktachichun”.
Shinami Daniel Mendoza kamachiy killkak rimarka. Kay kamachiymi Llankana Patakupi kallari llankay kanka, mananikunata alli rimayman pushana tukuchun nirka.
Kamachiy killkak Mendoza, kay Turismo kamachiytapash rimashun nirka, shinami kullki rikurichun llankaykuna allichirichun, mirarichun kay mushuk kamachiy yanapanka nirka, ashtawankarin 16 puncha, ayriwa killa, 2016 watapi allpa chukchuy tiyakpi wakllirichka kuskakunata yanapanka.
Mushuk llankaykuna
Chay Manabí markamanta kamachiy killkak mushuk llankay kamachiyta churanami paypak yuyaypi kan, Mamallaktapi kullki tiyachun llankayta wiñachinatami ashtawankarin riman, chay Manabí, Esmeraldas llaktakunapimi yallita yanapanka, mayhan runa mushuk llankayta rurakuktami Mamallakta chay llankayta achkata yanapana kan.
Mashna watata charikta mana rikunkachu, mushuk llankaykunata wiñachiktami rikunka. “ Tawka hillaykunata, sumak ruraytami charinchik, chaykunawan llankashpami mushuk ruraykunata wiñachinka, kullkipash mirarinkami. “ Kay llankaykunata tankachunmi shuk kamachiy tiyana kan ”, nirka.
MC/pv/-kichwa
