Julio killa raymikuna ukupi, Derecho a la Salud Minkarishkakuna, Juan José Reyes kamachi killkak pushakushka, Guayaquil llaktapi llamkarkakuna, kaypika Ley para la Prevención de la Obesidad kamachiy rurana killkata riksirkakuna, kay llakikuna Ecuador llakta ayllukunata wakllichikushkamanta rikuna mutsurin, nirkami.
Kay rimanakuypika, kamachi killkakkunaka Resolución CAL-2017-2019-644 killkatami riksirkakuna, kaypimi kay Ley para la Prevención de la Obesidad en la Población kamachiy rurana killkata akllarkakuna, María Mercedes Cuesta ñawpa kamachi killkakmi chayachirka. Kay kamachiy ruranapika wirasapayta ancha unkuy kan nishpa shutichinapak mañan shinallatak llaktapak hampinapi llakishina rikurishkamanta, kayshina wirasapayayka shunkupak, wayra aysanapi, diabetes, cáncer, shuktak unkuykunata ashtawan mirachin nishpa.
Kay kamachiy rurana killkata riksishka kipaka, Minkarishkata pushak, Juan José Reyes, kay Ley Orgánica de la Función Legislativa kamachiypak 57 niki killkata paktashpa, imalla yuyaykuna charishkata willachun mañarka shinallatak llamkay kallarichunpash kayachirka, kamachi killkakkuna shinallatak llaktayukkunapash, Mamallakta Tantanakuypak nakashpaka Minkarishkapak llikapankakunapi riksiy ushan nirkami.
Kamukunata tantachinkapak
Diabetes unkuyta harkanapak mañay kashkamanta, Ley Orgánica de la Función Legislativa kamachiypak 135 niki killkata katishpa, Minkarishkakunaka kay Ley para la Prevención de la Obesidad kamachiy rurana killkata Ley de Prevención, Protección y Atención Integral de las Personas que Padecen Diabetes kamachiy mushukyachinapak mañashkata killkata, kunanpi ishkayniki rimanakuypak llamkaywillay paktarikukta tantachinapak yuyaypaktarirkakuna.
"Kay yuyayka mana mutsurinllachu ashtawanpash utkashpa mutsushkami kan", kashnami Diana Blacio kamachi killkak nirka, payka shukllapi tantachinapak mañayta chayachirka. Kay yuyaykunataka tantachishpami rikuna kan, llaktamanta hampinata shukyanchishpa riksinapak, nirkami.
RSA/cg-k
