Tukuykunami, kay Consejo de Administración Legislativa (CAL) wankuripi kay Ley Orgánica para el Control de Flujos Irregulares de Capitales kamachiy ruranapak killkata akllarka, Llakta pushak, Daniel Noboa Azin, kullkimanta utkashpa ruranapak nishpa chayachishka karka.
Kay kamachiywanka ayllukunapak tantanakuykuna, wankuriykuna shinallatak kay Ecuador llaktapi kullkimanta mana llamkak wasikunaman mana riksishkamanta mapa kullki ama chayachunmi rikuranka, kay kamachiy rurana killkataka Desarrollo Económico, Productivo y la Microempresa Minkarishkapimi riksishpa allichinkakuna. Kay ishkay rimanakuypi allichinapak, Mamallakta Tantanakuyka 30 punchakuna ukupimi paktana kan, kashnami Mamakamachiypak 142 niki killka shinallatak Ley Orgánica de la Función Legislativa (LOFL) kamachiypak 62 niki killkakuna rikuchishkata katishpami paktarinkakuna.
Niels Olsen pushakuypi, Mamallakta Tantanakuyka llakichik tantanakuykuna mana allimanta charinata, kullkita paktachun harkanapakmi, rikunapakmi kamachiykunata alli pakta allichishpa yanapachunmi llamkakun.
Kamachiyka Ecuador llakta charishkata ukllashpa katinapakmi shinallatak kay llaktapi llamkak ayllukuna tantanakuykuna pakta kamachiywan, achikllata shinallatak ayllukunata yanapashpa llamkachunmi yanapan. Kayshina yanapaywanka, Mamallakta Tantanakuy shinallatak pushakpashmi pakta yuyaysapa shinallatak utkashpa llamkanapak arinishkakuna.
Shinallatak, CAL wankuriyka shuktak chusku kamachiy rurana killkatami akllarka; kamay paktanamanta; Fuerzas Armadas shinallatak Policía Nacional tantanakuy makipuranamanta; llaktaman chayachinamanta; llakichikukpi hapishka chaypachallaktak riksichina. Minkarishkakunaka kay yuyaymantallatak rimak shuk killkakunata shukllapi churanamanta rikunkakuna.
Chaykamaka, tukuykunallatak arinishpa, Consejero de Participación Ciudadana y Control Social, Gonzalo Albán tantanakuyta pushak, Gonzalo Albán runata llaktay ñawinchiy kallarinapak akllarka, kayshina yuyaypaktariymanka, Unidad de Técnica Legislativa (UTL) wankuriy kay mañaykunata riksishpa tukuy mutsurishkatami charin nishpa riksichishka kipa. Kay LOFL kamachiypak 80 niki killkapika, Fiscalización y Control Político Minkarishkami kayshina llakay ñawinchiy paktarinapak minkarishka nin.
Shuktakman minkana shinallatak kamachiy rurana killkata tantachina
Shuktakpika, wankurishkakunaka kamachiy rurana chusku killkakunatami shuktakman minkarka, kay yuyaykunamanta Consulta Ambiental y Consulta Previa, Libre e Informada, kunanpika Garantías Constitucionales Minkarishkapi llamkarikun, kunanka Biodiversidad y Recursos Naturales Minkarishkaman chayachin. Kayshinapika, Ley de Deportes Electrónicos kamachiy rurana killkaka, Educación Minkarishkapi llamkarikuk, Derecho a la Salud y al Deporte Minkarishka llamkachun chayachin.
Kayshina yuyaypaktarishkaka LOFL kamachiypak 21 niki killkata katishkami, kaypika ninmi kamachiy rurana killkakunaka kayshina yuyaykunamanta yachak minkarishkapimi allichirinka, nin.
Puchukanapakka, Código Orgánico de Planificación y Finanzas Públicas kamachiy mushukyachinata, Desarrollo Económico Minkarishkaman chayachin, kay kamachillatatak mushukyachinapak mañashkata Régimen Económico Minkarishkapi llamkarikuk, Kayllapitak allichirishpa katichun mañan.
CV/cg-k
