Rosa Elvira Muñoz, Fausto Cayambe apukkuna kay hunkay puchukay punchapika Colta kiti, Chimborazo markapimi llankarkakuna. Kaypimi llaktayukman willachirka shinallatak paykuna taripashkatapash kutichirkakuna kay mamakamachiy mushukyachinamanta, allpakuna mintalay chanimanta, charishkata pakta rakinamanta, wasi allpa mitanlay paktarinamanta, yalli kullki chanishkata rikunamanta, shinallatak shitashka allpakuna manu kullki chayachinamanta rimanakurka.
Shinallatak seguridad social tantariman llankana wasikuna llankak runakunata mana killkachishkamanta, llankak wasikunata sinchiyachinamanta, wasi rurashpa llankak tantarikuna wichiman wasichishpa ayllu llaktakunata wakllichishkamanta; pushakkanapak kutin killkarinata; shinallatak suman yachana wasikunapi wamrakuna killkarinamanta, wakinpilla yachana wasiman chayashpa yachayta tukuchinamantapash rimanakurkakuna.
Fausto Cayambe apukka wasi allpakuna mintalay chaninamanta rimarishpaka, kiti pushakkunami ishkay wata kipa catastral chani kullkita kutin rikunka, shinallatak Registro de la Propiedad tantanakuypak llankayka kiti pushakkunawan wankurishkami kan, nirkami.
Charinakunata kallaripi hapishpalla katun llakta kashkamanta, yuyayta, mushuk antakunata, mintalak yachak runakunawan llankak llakta kanatami munakunchik, yachaymanta rimashpaka, nirka. Kay punchakunami Ingenios shuti rurarina kamu killkata Mamallakta Tantanakuy riksikun, nirkapashmi.
Kay watapak ayriwa killapi Mamallakta Tantanakuymi Ley de Justicia Laboral y Reconocimiento del Trabajo de las Amas de Casa kamachiyta arinirkakuna, kay kamachiyta paktachishpaka 3.000 warmikuna Seguro Social tantanakuyman killkarirkakuna. “Kunanka wasipi llankaytami riksirin; wasipi llankak warmikuna killkarishpa yuyakyashpa samana kullkita, wañukpi, montepío, tisikuyakpi, yanapayta, wañukpi yanapaytapash chaskichunmi yuyayka” nirkami Fausto Cayambe runaka.
Shinallatak Rosa Elvira Muñoz apukka Tierras Rurales y Territorios Ancestrales kamachiyka paklla ayllukuna, tarpukkunatami kullkita mañanapi, mañaykunapak paktaykunata ashayachishpa, urkukunata ukllashpa, tarpuna allpakunata rikurashpa, kitikuna ayllullaktakuna maykama mirarinata rikurashpami yanapanka, nirkami.
Shuktakpika, llakta ayllu wamrakuna sumay yachay wasikunaman semipresencial paktay yachayman mana yaykuna ushaskami sustachin nirkami. Mamakamachiyka tukuykuna yachayta charichunmi yanapan, kay llakikunaka rikurinmi sumay yachana wasikunallatak kay semipresencial paktay yachayta wichkashkamanta, shinallatak Mamallakta Tantanakuyka Ley de Educación Superior kamachiy paktashkata ñawinchiymi kallarin, nirkami.
JLVN/pv
