Mama Gabriela Rivadeneira, Mamallakta Tantanakuyta pushak, Bloque PAIS tantariman kimirishka kamachiy killkak, Mamabí llaktapi allpa chukchuywan llakirishka runakunata yanapankapa arinirkakuna, llankay kullkimanta sapan killapi, ishkay killakaman 10% patsakri kullkiwan yanapanka nirka.
“Ecuador llaktapi kawsak tukuy runakunami yanapana kanchik. Kamachikkuna rimashkata uyashpami, ñukanchikpak wawkikuna mutsurishka pachapi tantarina kanchik, mana chikan chikan yanapana kanchik”, shinami Mamallakta Tantanakuy pushak rimarka.
Mamallakta Tantanakuypak willana hillaykunawan, runakuna mayhan kuskamanta runakuna yanapachun Ayudatón shutiwan kayanka, shina wasikakunata kutintak allichinkapa nipakunawan yanapanka, kullkiwan yanapanka, wasita kutintak allichinakpa, mushuk wasita ruranka nipakunawan wakllirishka llaktata yanapanka.
Kamachiyta manarak arinishka tapuy llankaypash ashalla pachakama chaypilla sakirinka, minkashkakunapak llankaypash samachishka kanka.
Mamallakta Tantanakuy arinishka, tantarishka yanapak runakunata churanka, kay llankaytaka Ministerio de Inclusión Económica y Social – MIES kamachikkuna imshina yanapanata rikisichinka, paykunaka maypimi wakllirishka kuskaman chayanka, runakuna ima yanapashkatami nikinka, allichinka, kipita ruranka, pichanka, antawapi apanka, shuktakkunawanpash yanapanka.
Kunan punchamanta, Mamallakta Tantanakuy Quito llaktapi paypak wasi punkuta paskarka, chaypimi wakin runakuna karashka kipikunata chaskinka, mikunakunata, yakuta, mitachita antamikunata, churarinata, katata chaskinka, chay nipakunata MIES kamaywasiman chayachinka.
JC-kichwa
