Shamuk chilla puncha, 3 puncha, karwa killa, Ecuador llaktapak Mamallakta Tantanakuy Mamakamachiy paktashka kamuta rikuchinka, chayka “Iaskun Watata Mamakamachiy paktashkata” rikuchinka. Chaypak mama Gabriela Rivadeneira Mamallakta tantanakuyta pushak kayan, payllatak Azuay, Manabí, Guayas, Cañar markakunapi rikuchishka.
“Kay 10 wata Ecuador llaktapi llaktay, achka llakta ushay tiyashka. Chay Montecristi llaktami Ecuador llaktapi kawsak runakunapak munayta atinakunkapa kuska karka”, shinami mama Rivadeneira rimarka.
Kay kamuka, chay Asamblea Constituyente llankashkamanta, kunankama Mamakamachiy llankashkatami rikuchin, kay Función Legislativa kayapak llankanatami rikuchin.
Kay kamuta riksichika, Mamallakta Tantanakuypak Mejía Lequerica ukupi kanka, shinami 18:00 sayllamanta kallarinka.
Chay 2008 watapi killkarishka Mamakamachiy Ecuador llaktapak wiñaykawsay ukupimi tiyarin. Mamallaktata mushukyachinkapa tiksi hillaymi tiyarirka, Mamakamachiywanmi Mamallaktata kutintak tarirkanchik, mushuk wiñariy kallarirka, hayñikunata ukllankapan hatun hillaymi kan. Shinami kamachiykunata mushukyachinkapa, mushuk kamachiykunata killkankapa achkata yanapashka, achka kamachiy kamukuna runakunapak makiman chayashka, hayñikuna wiñarichun, mushuk kamaywasikunaka wiñarichun yanapashka.
Kay kamuka Mamallakta Tantanakuy kay iskun watapi achkata, imatalla llankashkatami rikuchin, achka yuyaykunapi, Tiksi Kamachiykuna killkarichun, kay kamachiykuna llaktakunapi paktashkata rikuchun yanapashka.
Kay kamuta riksichina tantayaripika kamachiy killkakkuna, Mamallakta awllipak hatun kamachikkuna, amawta yachayta charikkuna shamunka.
LM/pv/jc-kichwa
