Kay Consejo de Administración Legislativa (CAL) ishkay sayllata rimanakushpa, Jorge Glas Mamallakta Kipapushakta wanachina mañayta washaman churarka, wanay pankakuna mana alli kakpimi mana arinirka.
Kay José Serrano, Viviana Bonilla, Carlos Bergmann, Verónica Arias, Soledad Buendía kamachiy killkakkuna wanayta wakaychichun mañarka, kutin Patricio Donoso, Luis Fernando Torres wanay katichun mañarka.
Mamallakta Tantanakuyta pushak Serrano Salgado, chay Roberto Gómez kamachiy killkak chay Caminosca llankakwasiwan llankayyuyari panka mana achiklla kashka rikurin nishpa riksichirka, chay panka mana pusharishka kan nirka. Kay llakika Estados Unidos llaktapi mana riksishkachu kan, ashalla kamachik riksin, kay panka wakaychirinkapa kakunn nirka.
“Kay panka alli kan nishpa chaskishpaka Mamakamachiyta, kamachiytami pakishun, chayka mana allichu kan nirka. Kamachiy mana arinishka pankataka ñukanchik allimi kan, nishunchu, chay pankata yanka, shuwashpa hapishkami rikurin nirka”, supaychaymanmi pushanka nirka.
Shuktak manyamanta rikushpaka, Mamallaktapak shutipi mana shuwayta, pakalla rurayta, yanka kullkita kuchikta, yanka kullkiyuk tukushkata rikuchinchu, shinallatak Mamallakta kamayta wakllichishka, wañuchishka, shuktak huchakunata rurashka mana rikurinchu nirka. Mamakamachiypak 129 nikiwan mana kimirinchu.
Kay Caminosca llankakwasi, kay huchata rikuchik yanka, llulla panka mana pusharishkachu kan, ashalla kamachik riksin, anchurikuk pankami kan nirka. Chaymanta Mamallakta Kipapushakta mana wanachinkachu.
Kutintak Glas Kipapushakta wanachinankapa huchata rikuchik pankakunata chayachimukpika, huchachikmi tikra huchata aparichun rikuna kanka, Mamallakta Tantanakuyta pushakmi shina rimarka. Kamachiy mañashkata paktachin, mana paktachin chayta rikuna kanka nirka.
MG/pv/jc-kichwa
