Kay hunka tukuri, Santo Domingo llaktapi, chay Biodiversidad y Recursos Naturales minkashka, mapa rirṕu, anta hawa tukuy Mamallaktapi maypipash shitashkata rikunkapa yuyarirka.
Kay rimanakuyka tsáchila markapi kawsak runakuna mapa rirpu, anta maypipash shitashka pachamamata mapayachikuk willayta uyarka.
Kipamanka, imashina allichinata rimarka, chay tantaripika, chay llaktapak 30 kamachikkuna, tantarikuna, kapukyachikkuna, yachakkuna, Ministerios de Ambiente kamachik, Agricultura kamachik llakita rikuchirka.
Yallita rimashka, pachamamata mapayachikushka, imashina kay llakita allichina hawa piñanakuy rimay karka, Santo Domingo huntachishka allpa, La Concordia llaki hawa rimarka.
Kay llaki hawa Tsáchila runakuna, Confederación de Nacionalidades y Pueblos Indígenas de la Costa (Conaice) tantarimanta runakauna Poste mayupak, Chiguilpe mayupak, Peripa mayupak llaki hawa riksichirka, chay mayukunaka kanchis tsáchilas ayllullaktata yallin, achka mapayashkami kan nirka, runakunata unkuchin, kawsay yachaykunata wakllichin nirka.
Mana tsáchilas ayllullaktakunatalla mapayachinchu, Blanco, Toachi, Baba mayukunatapash mapayachinmi, shinalltak Esmeraldas, Guayas yakupampakunatapash mapayachin nirka. Yalli llakika mapayakuta kachana tutu illak, kiti llaktamanta shamuk mapa yakuta chuyayachina llaki tiyan nirka. Kay mapa yakukunaka pakllapi kawsak runakunata llakichin nirka.
Sachamanta hapishka wiwakunata charina wasipak kullkimanta, kitipi tiyak sachakunata ukllana, wiwakunata chapana panka rikuna, pachamamata chapana panka, unkuykunata imashina harkana hawa hatun rimanakuy karka.
JC-kichwa
