Llakatakuna, kamachikkuna, tantarikuna yuyayta, mañayta churashaka kipa kay Código de la Salud kamachiy llaktayukkunapak mañayta chaskin.
Kayna 6 punchamanta iashkaykutin atinakuy kallarirka, kay mushuk allichishka kamachiy kamaywasita, runakuna mañayta yanapanka.
Kay mushuk kamachiyka kimsa hatun kamuta charin, chayka: Sistema Nacional de Salud (34-108); ishkayniki kamuka cuidado integral de la salud (109-354) riman; kimsaniki kamuka Régimen de Control y Sanción en el Sistema Nacional de Salud (355- al 405) hawa, shuktak nikikuna hawapash riman, kaytami allita killkakatishpa allichina urman.
Kamachik William Garzón, Comisión del Derecho a la Salud tantarita pushak, kay 50 watapi alli kamachiy llukshikrin nirka. Kay Autoridad Sanitaria Nacional kamachikkunata yanapan, kay Sistema Nacional de Salud llankaypak kullkita churan, kay Seguridad Social karmamanta kullkita mana hapin, yapa Red Pública Integral de Salud llankayta, Modelo de Atención Integral de Salud llankayta sinchiyachin, shinami Mamakamachiy rimashkata paktachinka nirka.
Llaktayukkunapak yanapay
Kay mushuk kamachiyta yanapak Joaquín González, chay Sistema de Naciones Unidas en Ecuador kamachik, kay Código kamachiy llukshichun yanapakun, shinami Agenda 2030 llankayta yanapanka. Kay kamachiyka kipaman runakunaman allikawsayta, wawakunaman allikawsayta achkata yanapanka, hampikkuna paykuna yachashkawan alli llankachun yanapanka rimarka.
Shinami, Gina Watson, Organización Panamericana de la Salud (OPS) kamachik, kay mushuk kamachiywan llankanata sinchiyachin nirka, Mamakamachiy rimashkata hampirinaka shuk hayñi kakta paktachinka. Ista llaktamanta kamachikkuna rikukpika, ishkayniki atinakuyka may mutsurikmi kan nirka, shinami Mamallaktapi, Apyayala llaktakunapi hatun kamachiy kanka nirka.
RSA/eg/jc-kichwa
