Kay Comisión de Desarrollo Económico tantariman yaykurishka kamachiy killkakkunawan kimsa sayllata rimanakurka.
Paykuna rimanakuyta charichun kamachiy killkak Esteban Albornoz tantarita pushak kayarka, paykunawan Covid-19.unkuyta takankapa hampikunata rantinkapa maymanta Mamallakta kullkita charinata rimanakurka.
Manarak kullki llakita rimashpa, minkashka kamachiy killkakkuna, tukuy Mamallakta shuklla tukuna kanchik nirka.
Chaymanta Gobiernos Autónomos Descentralizados kamachikkuna, Gobierno Central kamachikkunawan kimirishpa kamachun, rikuchun mañarka, llaktayukkuna wasimanta ama llukshichun mañarka, shina unkuy ama katichun, Ecuador llaktapi ñami 199 unkushka rikurin, willarka.
Kay wakcha runakuna mañashka kullkimanta wawakullkita mana kuchun yuyayta kurka, shinallatak wakcha runakuna mañashka kullkimanta 50 % patsakritalla tikrachichun mañarka. Wakinkunaka Mamallaktami unkuyta harkanata charin, kullkitapash mana maypipash kachun tukuchichun nirka, yalli kullkita charikkuna yalli kullkita llakipak churachun mañarka.
Kamachiy killkakkunaka Mamallakta Tantanakuy tawka kamachiykunata arinishkata, chay yuyaywan karka, kay Fomento Productivo kamachiy, Emprendimiento kamachiy Mamallaktapi kullki wiñarichun yanapanka nirka, kay kamachiykunawan ña utkashpa llankana, shina kullki yaykurichun Minkashkata pushak rimarka.
Kamachiy killkakunaka kitiñanta purik runakunamanta, mitmak runakunamantapash yuyarirka, kay Mamallaktamanta shuktak Mamallaktapi taririk runakuna, ñukanchik llaktaman shamuchun mañarka, kaytami hatun kamachikkuna, istawasipak kamachikkunawan rikuchin mañarka. Paykuna kay llaktaman chayamukpi chay runakuna allita chaskishka kachun mañarka.
SV/cz/jc-kichwa
