Kay Comisión de Biodiversidad tanta, kutintak rimanakuyta charinkapa Consejo de Administración Legislativa (CAL) kamachikkuna suninishka punchakunata kuchun mañan.
Chay punchakunapi Régimen Especial de la provincia de Galápagos kamachiyaman mushuk yuyaykunata chaskinka.
Kunan tutamanta rimanakuypi tantarishka kamachiy killkakkuna Wayta llakta runakuna mañashkata yuyarirka, paykunaka Régimen Especial de Galápagos kamachiyta manarak arinichun mañarka.
Chay COVID 19 hatun unkuymanta chay llaktapi llankaykuna shayarishkata, chay rayku runakuna llankayta mana charishkamanta ashtawan wakchayashkata riksichirka. Wayta llaktapi runakunawan rimanakuyta charina mana hawalla kan nirka.
Wayta llaktapi kawsak runakuna kamachiyta atinakuypi kana kan, chaypak riksina, pachamama, purina llankayta, chalwana, mamakuchapi mintalana, shuktak llankaykunata churana nirka. Mamakuchapi wampuna, antankapi purina, warmikuna makirurana llankayta churana nirka, shinallatak karikuna, pakta runakuna, tarpuna, wakra wiñachina, shuktak ruraykunata churachun tantarina patakupi kak kamachiy killkakkunaman rikuchirka. Kaytami rimankuy pataku allichinka, rimarka..
Kamachiy killkak Juan Cárdenas, tukuy kuskamanta runakuna rimana hayñita charin nirka, chaymanta paykuna rimachun, yuyayta churachun Minkarishka pataku punkuta paskana nirka, wayta llaktamanta churashka yuyaykunata hapishpa kamachiyta atinakuchun churana nirka. Kutin Juan Cárdenas kamachiy killkak kamachikkunata akllana punchakuna paktamun, chaytapash rikuna kan nirka.
Wakin kamachiy killkakkuna wayta markapak runakunapak yuyayta chaskinka kimsa killata kuchun nirka, chaykaman chuskukutin rimanakuyta charichun, chaypi imashina kamachiy killkarinata riksichichun nirka. Chay rimanakuyman yuyaykunata hapishapa ishkaykutin atinakuyta rurachun alli willñayta Mamallakta Tantanakuy hunta tantarishpa atinakunka nirka. Shuktak kamachiy killkakunaka yalli pachami kan nirka.
JLVN/cz/jc-kichwa
