Mamallakta Tantakuyta pushak, César Litardo Caicedo, ayriwa, chaska 30 puncha allichishka Transporte Terrestre, Tránsito y Seguridad Vial, Hatun Kamachiyta apuchinamanta willarka.
Kay kamachiyka kamachiy killkakkuna yuyaykunata churashkatami charin nishpa willarka. Kay kamachiytaka ishkay watamantami atinakushpa allichishpa shamushka kan nirka.
Kay atinakuykunapika 22 antawa purichik tantarikuna, kamachikkuna, 35 kamachiy killkakkuna rikuykunata, yuyaykunata churashka kan. Paykunaka kay Tránsito, Transporte Terrestre y Seguridad Vial kamachiy antawa, antawa purichik llakikunata charikpi allichinkapa yanapachun, runakuna ama llakipi urmachun yanapanka nirka.
Shinallatak, rimanakuy punchakunami antawata allichinapi watapi shukkutinlla rikuchun mañarka, kunan kamachiypika watapi ishkaykutin rikuchun mañan, chaytaka mana munanchik nirka. Shinallatak kimsachakiyuk aparik antawa, tiyarishpa purina kuyu llankachun mañarka, chaykunataka Gobiernos Descentralizados (GAD) kamachikkuna rikuchun mañarka, llakikuna tiyakpika wanachina kanka nirka.
Antisuyupika ishkay tiyarina ukuta charik antawakuna runakunata aparishpa llankachun kamachiypi killkarichun mañarka, chay antawakuna runakunata pushashpa, kipikunata aparishpa muyuchun nirka. Shinallatak pakllapi llankak antawakuna, kitipi muyuk antawakunawan ama takarichun, kipikunata, runakunata mitsashpa ama llakirichun mañarka.
Chay Seguro Público de Accidentes de Tránsito (Spat) llaki yalli kakpika, kamachiywan ashayachina nirka, antawa ñan hawata purina chakata rurachun, runakuna yallina unanchata rikuchichun mañarka, maypimi antawakuna shayarina kuskata rurachun yuyayta kurka.
Kamachiy killkakkuna tukuy rimashkata, atinakushkata shuklla yuyayta rurashpa rimanakurka, chaymanta Mamallakta Tantakuyta pushak, César Litardo Caicedo, 24 sayllallapi rikuykunata churachun, tukuri killkata rurachun mañarka, chayta Mamallakta Tantanakuy arinichu churana nirka.
JLVN/ea/jc-kichwa
