Shinami Mamallakta Tantanakuyta pushak, Guadalupe Llori Abarca, Rusia llaktamanta Vladimir Sprinchan istakamachikta chakirka, paypak llakta hatun Cámara Alta del Senado tantarimanta, shuk kushipankata makipi charichirka.
Chay pankapika Ecuador llaktapak Mamallakta Tantanakuyta pushak tukushkaman yupaycharka. Paypak llaktawsan, Ecuador llaktawan makita kushpa llankanata yuyarirka.
Mamallakta Tantanakuyta pushak, Guadalupe Llori Abarca, kunan wata, wayru killapi Foro Internacional de Mujeres Euroasiático hatun rimanakuypi kachun kayarka, chaypimi warmi hatun kamachik, warmi kamachiy killkakkuna, warmi llankakwasita pushak allpapachapi kakta riksin nirka
Tayta, Sprinchan, istakamachikka paypak llaktawan, Ecuador llaktawan makita kushpa llankanka sinchiyashkami kan, mintalashpa llankanapash shinallatakmi kan nirka. Palanta, sisa, lluchunka, shani, shuktak kapukkunata rantinchik nirka. Ecuador llaktamanta yachakukkuna yachachun yanapaykullkita kunchik nirka.
Shinallatak Rusia llaktamanta hatun kamachikkunaka Ecuador llaktaman hillaykunata, kuyukunata, chachlli kapukta, tawkasami kullkita mirachik llankaykunapi kullkita churanapash tiyanmi nirka.
Shuktak yanapaykunata chay Sputnik V hampiwan añawllawtuta harkana nirka, paypak llaktapi rurashkami kan nirka. Chaytaka llaktapuramanta hatun kamachikkunami yuyarina kan nirka, kunanpika mintalayta pushanka rimanakuy tiyan nirka.
SV/pv/jc-kichwa
