Mamallakta Tantanakuyta pushak, Guadalupe Llori Abarca 2021 watamanta, 2022 watakama katikillata Mamallaktaman rikuchirka.
Kay katikillaka llaktay tantarikunata pushak, minkashkakunata pushak, Consejo de Administración Legislativa (CAL) kamachikkuna arinishkami kan, kay Covid 19 hatun unkuy waktashka llankaykunata, kullkikuna allichinkapash.
Kamachik Mamallakta Tantanakuyta pushak, Guadalupe Llori Abarca, Mamallaktapak kullki llakita, llankay llakita allichinkapa ña allichirishka kanchik nirka.
Mamallakta waka kawsayta, wakcha kayta allichishpa pakta pakta kushilla, sumaychashka tukuykuna kawsachunmi mañan nishpa llaktakunaman achiklla risichirka.
Kunanka sara kaspashina kakta rikuchishkami sakirin, tukuy murukunashina tantarishpa minkata rurashpa katikillata rurashkanchik nirka. Kay Ecuador llaktaka ñawpachamanta yachaykunawan, llankay wallparishpa shamushkami kan, kunanka kay Mamallakta Tantanakuypi rikurin, chaymanta ishkaywatapak katikillata rurashkanchik, Guadalupe Llori kamachik nirka.
Kay Mamallakta Tantanakuypak katikillataka, pichka tiksita charin, chayaka yachayta, kamayta, allikawsayta, llankayta, llankay hayñi, kullki mirarina, ayllumanta, kari warmi pakta kana, runallaktakuna ashtawan yanapana, llankaykunata achiklla rikuchina, shuwaykuna tiyakpi takana nirka. Chaymanta sapan sukta killapi kamaykushka, allichishka kanka, rimarka.
Minkamanta rimashpaka, runakunapak hayñinanta, ayllukuna kari warni pakta kawsachun kamana, chapana kachun mañarka. Chaymi Ecuador llaktapak hatun tiksi kanka, llaktakunapi llankaykuna, taripaykuna, mushuk ruraykuna, amawta taripaykuna mirarinka nirka, ayllunapi, kusawarmi kawsaypi takaykuna picharichun runapak hayñita yachachina nirka.
Kay katikillawan Pachamamata kamana, Antisuyupak, allpapachapak parukmi kan, Guadalupe Llori, Mamallakta Tantankuyta pushak rimarka. Shinallatak runakunapak, llaktakunapak kawsay hayñita ukllana, kamana kachun tukuy kamachikkuna, kamaywasikuna rimanakuna kan nirka.
Mamallakta Tantankuyta pushak, Guadalupe Llori, kunanka chikan mushuk Mamallakta Tantanakuymi kan nirka, Mamallakta Tantankuypak wasi punku paskashkata charinka, chayman tukuy sami kawsayta charik runakuna rimanakunka, tantarinka, paykunapak yuyayta churanka kishpirishka yaykurinka, nishpa willarka.
Kamachiy killkakkunapash rimayta charirka, Alejandro Jaramillo, Izquierda Democrática llaktay tantarimanta, Código de Entidades de Seguridad Ciudadana kamachiyta; Derecho a la Salud kamachiyta; Educación Superior kamachiyta, kay Gestión de Riesgos kamachiyta allichina, nikikunata allita nikina, 2022 watakama achka kamachiyta allina kan nirka.
Paymanta , Juan Fernando Flores, Bancada Acuerdo Nacional llaktay tantarita pushak, kutin Paola Cabezas, Bancada de la Unión por la Esperanza llaktay tantarita pushak, 18 mushuk kamachiykunata killkanka, chaywan wakllirishka runakunata kamana, yanapana nirka. Rafael Lucero, Bancada Pachakutik llaktay tantarita pushak pachamamata ukllana, pakllapi kawsak runakuna, llaktayukkunata yanapana nirka, runakunata tukuylla llankaykunapi churana nirka.
Kutin Marjorie Chávez, kamachiy killkak, Bancada del Partido Social Cristiano llaktay tantarita pushak, Consejo de Administración Legislativa kamachikpash kan, payka minkata rurashpa shuwakunata katina, llankaykunata achiklla rurana, alli kamachiykunata killkana, Mamallakta llakikuna tiyakpi kamachiykuna rimashkata katishpa chapana, allichina kachun mañarka.
JLVN/pv/jc-kichwa
