Mamallakta Tantanakuypi, 131 ari apushitaywan, kay Ley de Vivienda de Interés Social kamachiy rurana killkata arinirkakuna, kamachiytaka Gobiernos Autónomos,Descentralización, Competencias y Organización del Territorio Minkarishka allichishka killkatami riksirkakuna, kay kamachiyka llaktayuk mutsushka kawsana wasikuna charinatami yanapanka shinallatak wasichinapak tukuy mañaykunatapashmi ashayachinka.
Kamachi rurana killkataka shamuk llankana ishkay puncha ukupimi llakta pushakman riksishpa arinichun chayachinka, kamachiyka llaktayuk mutsushka kawsana wasita charinapakmi mashkakun, shinami wasichinapak llankaykunata wiñachishpa, llaktayukpura tantarishpapish llaktamanta, shukllamanta wasichinata wiñachinka; tantanakushpa sinchiyanata shinallatak llaktayukpak kullki llankay, llankay ñantapash wasikunata rurashpaka yanapanka.
Shinallatak, Wasichinapakka llaktamanta, shukllamanta kay llakta ukumanta ista llaktamantapashmi kullki mashkanapak yanapan; shinallatak, chikanyashpa pushakkunaman llaktayuk mutsushka wasikunata chayachinapak hillaykunata chayachinka.
Rimanakuypika 23 kamachi killkkunami rimarirkakuna, killkata riksichik, Celestino Chumpi kamachi killkakwanpash, Gobiernos Autónomos Minkarishkata pushak. Tawka wankurikunami kay kamachiy arininapak kimirirkakuna, Ecuador llaktapi kawsana wasikuna achka illashkata riksishpa, kimsa hunu yalli wasikunami kawsanapak illan, shinallatak runa ayllu llaktakunapi, wakinpikarin kitikunapipash kawsanapak mutsushkapash illanmi.
Yuyaykuna chimpapurayka tawkakunami tiyarka, tukuy llaktapi tawka kawsak wankurikunata, kiti tantarikunatapash kamaywan paktachinapak, llaktayukkuna kikinpak wasi iñik pankata paktachunkuna, kay pankakunawanka kawsanapak mutsushkaman paktanapak, suyu llaktapi, kitikunapi, markakunapi, kitillikunapipash chikanyashpa pushakkunawan paktarishpa llankankapak.
Chayshinallatak, chikanyashka mañaykuna tiyachun mañarka, kayshina, runa ayllu llaktakunapak kikin kawsayta tantanakuykunata, shinallatak pachamama wakllirinalla allpa alli tantachinapak rikuchik pankakunata, Galápagos yawanti allpata shina, kay Patrimonio Natural de la Humanidad unanchata charishpa katinkapak mañarka.
Taripay shinallatak katiraypash
Rimanakuyta wichkaypi, Guadalupe Llori Abarca, Mamallakta Tantanakuyta pushakka, llaktayukkuna yanapana yuyaywan kamachi awllipi sinchita llankashkata riksirika, kay llankaykunaka "Minga por el Ecuador 2021-2022" llankayñanpi churashkami; shinallatak, ashtawan nirkami "Kay Ley de Vivienda de Interés Social kamachiyta arinishka paktarinaman yaykurishka kipaka kamachi imashina paktarikushkatami taripanka, kayshinami Ecuador llakta ayllukunaman pakta yanapayka chayanka".
EG/pv/cg-kch
