Mamallakta Tantanakuypi kay Ley para Fomentar la Producción, Comercialización, Industrialización, Consumo y Fijación del Precio de la Leche y sus Derivados kamachi rurana killkata shuk niki rimanakuypi riksirkakuna, kay kamachiyka ñuñu mashna llukshichinata, imashina mirachinata, apanata, ñuñuta maypi wakichinata, ruraykunaman paktanata, chaninata, minatalanapashmi rikunka.
"Kay kamachi rurana killkawanka, mamallaktapak alli hampi kawsayta, mikunatapashmi alli chayachinapak mashkakunchik; llaktapi ñuñuta llukshichishpa llankakkunata yanapashpa, ashtawankarin ashalla wakrata wiñachikta, runa ayllukunatapash pakta pakta llankanapak kamachita charichun, charishkata pakta chanipi mintalachun shinallatak ñuñuta, ñuñumanta llukshishka yakuta pakalla apamushkata harkachunpash", kashnami Mamallakta Tantanakuyta pushak, Guadalupe Llori Abarca, nirka.
Kay kamachiyka Mamallakta Tantanakuy 2021 - 2022 wata kullkillankaymanta, ruray llankaymanta, llankay wiñachinamanta, llankakpak hayñikunamanta, seguridad social yanapaymantapash llankanapak churashkapimi rikurin, shinami ruraykunata, alli llankayta charinata, mushuk llankay wiñachinata, mushuk yuyaykunawan llankanata shinallatak mushukyanatapash sinchiyachinka.
Mariano Curicama kamachi killkak, Soberanía Alimentaria Minkarishkata pushak, kamachi rurana killkata riksichikpash, ñuñuta llukshichishpa punchanta kawsakkuna llakirishpa mañashkamanta rurashka kamachiymi. "Runa llaktakunapi sinchi llankayta riksirishpa allichishka killkami, chaymantami markakunapi wakrata wiñachik uchilla, maltalla tantanakuykunawan makipurashpa allichishkanchik", nirka.
Kunan punchakunapika, litro tupu ñuñuka 33 centavos kullkipimi chanishka, llankashpa katinapak churashka chanita mana paktachinchu shinallatak, ñuñu llukshichishpa llankakkunaka paykunapak llankay paktashkatapash mana kutin hapinkunachu. Chaymantami, chaparayta sinchiyachina mutsurin, shinallatak, ashtawankarin, paktanapak churashka chanikunata mana katikpika wanachinami kan, nirkami.
Llaktayukta Chakiy
Rimanakuna ñawpaka, Mamallakta Tantanakuyman, Gustavo Albuja, Luis Francisco López, Santiago Malo, Ángel Cutucuambia shinallatak Alexandra Abad runakuna, mamallaktapi ñuñuta llukshichishpa llankak tantanakuyta pushakkuna chayamurka, paykunaka llankayta yanapak kamachiyta rurana ancha mutsurinmi nirkakuna, shinami pakalla llankayta chimpapurashun, ñuñumanta llukshishka yakutapash ashayachishun, chawpilachishpa mintalaktapash chimpapurashun shinallatak, ashtawankarin, ñuñu mintalaypi pakta chanipi katurichun, nirkami.
Rimanakuy
Rimanakuyka, 13 kamachi killkakkunami rimarirkakuna, kay kamachiyta arininapak yuyaymi rikurirka, llakirishpapish, runa llaktakunapi llankakkuna mana pakta chanikpimi llankak ayllukunaka lakita kawsayman kitikunaman yallin, wakinpika istallaktamanpash rinkuna. Kay pandemia unkuyka llaktapi wakrata wiñachishpa kawsakkunatami ashtawan llakichirka, chaymantami kay economía popular y solidaria llankak ayllukunata yanapanapak Mamallakta Tantanakuyka pakta llanakun.
Kay kamachi rurarina killkaka Soberanía Alimentaria Minkarishkaman tirkan, kay Kamachi killkakkuna rimanakushka yuyaykunata tantachinkapak, kayshina ishkay niki rimanakunapak pakta llankaywillayta charinapak..
EG/pv/cg-k
Ashtawan Shuyukuna:
