Mamallakta Tantanakuypi kay Ley de Desarrollo Integral Fronterizo kamachi rurana killkata shuk niki rimanakuypi riksishpa kallarinkuna, kay kamachiywanka kasiklla kawsanata, llaktakuna ashata chikanyashpa rikuyta paktachunmi mashkakun; shinallatak kikin llakta pushakkuna llakta wiñariyta kikimanta rikuchunkuna, llankayta kamaytapash kay saywa llaktakunapi sumaychachun, kasiklla kawsachun, pachamamapak kawsayta rikurachun, llaktapura allichanata chaparachun, kikipak hayñikunata paktachichunpashmi sinchiyachinapak mashkakun.
"Ni mayhan llaktata mana kunkarishpami ñawpakman purishpa katina kanchik. Kamachiywanka saywa llaktapi kawsakkunaman chayachina kipayashkata kutichinapakmi mashkakunchik, llaktayukkuna llankay illaklla, pakalla apamuyta, umachinkachina mintalayta, wañuchiy llakikunatapash ashayashpa katinkapak. Ñukanchik saywallaktakuna ayllukuna kawsaypi, kullkillankaypipash sinchiyachunmi llankakunchik", kashnami Guadalupe Llori Abarca, Mamallakta Tantanakuyta pushka, nirka.
Kay kamachiy rurana killkaka Mamallakta Tantanakuy kay 2021 - 2022 watapi "hampinamanta, yachaymanta, kawsay tarpymanta, llaktayuk kashiklla kawsanamanta shinallatak llakikuna rikunamanta Minka llankaypi churashkami, alli kawsayta charinapak, llaktayukpura pakta, kasiklla, tantarishpa kawsanata kuyuchinatami mashkakun.
Kay rimanakuyka Soberanía y Seguridad Integral Minkarishka allichishka llankaywillaypi kimirishpami paktarirka, shinallatak llaktapak, shukllapak llankaywasikunata pushakkuna, yachak runakuna, llaktayukkunapash yuyaykunata chayachishkatami chaskirka.
PV/cg-k
