Mamallakta Tantanakuyka shukniki rimanakuypimi Ley del Servicio Publico Sobre el Régimen de Pensiones Vitalicias de Expresidentes y Exvicepresidentes de la República kamachiy mushukyachinata riksirkakuna, kaywanka llakta ñawpa pushakkuna llaktayukmanta akllarishka kakpika wiñayta llankaykullki chaskinatami allichinkakuna.
Kay kamachiy rurana killkamanka Ley de Servicio Público kamachi mushukyachinapak chunka ishkay kamu killka chayachishkatami tantachirka, kaypika llankaykullkita wiñayta hapinatami rimakun shinallatak mushukyachinapak mañaykunataka kapak killa 2018 watamanta sitwa killa 2021 watakamami tawka kamachi killkakkuna mañayta chayachirkakuna.
Rina Campain kamachi killkak, Minkarishkata pushak llankaywillayta riksichikpash, kamayta paktarinkapak shinallatak llakikunata chimpapuranapakmi mashkakun, nin. "Kay mushukyachiyka llakta ñawpa pushakkuna llankaykullki chaskikushkata 75% patsakmanta 50% patsakman ashayachinata shinallatak kay yanapayta harkachinapakpash llakikunata pichkaman mirachin", nirkami..
Rimanakuy
Tawka kamachi killkakkunami kashna llakichiyta anchichunami nirkakuna. Ashtawanka, kay yanapayta chaskinata rikurana, mashnakama paktanata churanapash nirka.
Ashtawanka, Pachakutik wankurimanta Mario Ruiz, Bruno Segovia, Darwin Pereira, Manuel Medina, Peter Calo kamachi killkakunaka kay wiñayta llankaykullki chaskina yanapayta anchuchcinami kan nirkami. Nirkakunami 81 waranka yalli kullkimi killanta chayachinapak chayan, ashtawanpash yachachikkunaman chayachinapak, hampi rantinapakpash kullki mana tiyanchu, nirkakunami.
Wilma Andrade kamachi killkapak rikuypika llaktata ñawpa pushak alli llankak runakuna, akllashka pachakunata tukuchikta mana wakllichina kanchu, ashtawanpash llankayta mana tukuchikta shinallatak wanachishka ayllukunatapash chikanmi rikuna mutsurin. Luis Almeida kamachi killkakka achka harkaykuna churana mana alli rikurinchu nin. Llankaykullkika llaktata ñawpa pushakkuna llaktayuk akllashkamanta yaykushkallaman chayachina, nirkami.
Kay Derecho al Trabajo Minkarishkami tukuy chayachishka yuyaykunata allichinka shinallatak ishkayniki rimanakuypak llankaywillayta allichishpa katikunkuna.
RSA/pv/cg-k
