"Kunanmi wiñaymanta atirikushkata, sinchiyashkata, hatun mashkaykunata achka watakuna ñawpa washayachishka, chikanyachishka, shinallatak warmi kashkamanta llukshishkata kunan yuyarinchik. Kunan punchami ñukanchik ñawpa pachakuna mishashkata yuyarinchik", kashnami Mamallakta Tantanakuyta pushak, Guadalupe Llori Abarca, kay Kamachi Awllipi llankak warmikunata kay Día Internacional de la Mujer punchata yuyarinakuy raymipi nirka.
Kay raymipika, pushak Guadalupe Llori kamachi killkak Consejo de Administración Legislativa (CAL) wankuri kamachi killkakkunawan makipurashpa warmikunaman, mamakunaman shinallatak llankayta wiñachik warmikunamanpash paykunapak sinchi llankaywan llakta wiñarinapak yanaparishkamanta shuk unanchata chayachirka.
Unanchakunataka Dora Mier, Kamachi awllipi 36 watakuna llankashkamanta; Sara Riofrio, kamachi awllipash; Evelyn Gualotuña, subteniente de Policía de la Escolta Legislativa chapak warmi; Daysi Ponce, wasita pichakkunapak shutipi; María Guanoluisa shinallatak María Guamán warmikuna Mamallakta Tantanakuy wasi kuchupi 50 wata yallita llankashpa kawsashkamanta.
Kari warmi llankak ayllukunapak shutipi Dora Mier, kamachi awllika, Mamallakta Tantanakuy pushakta yupaycharka, "Ñukanchik sinchi llankayta kamachiy awllipi riksishpa kamarishkamanta shinallatak, warmikunapak hayñi pakta pakta kachun shinchita llankakushkamanta yupaychani", nirka
Mamallakta Tantanakuyta pushakka, warmikuna punchanta llankakushkamanta, Antisuyu llakta, Mamallakta Tantanakuyta pushak kashkamanta llankak warmikunawan pakta pakta llankakunchikmi nirka, punchantami hayñikunamanta, pakta llankay charinamanta, llakta pakta kanamantapash llankan, nirkami.
"Mamallakta Tantanakuymantaka warmikuna pakta kanapakmi sinchita llankakunchik, llaktayuk pakta chayanapak, sumaychanapak, tukuykunata kimichinapak kallarichik yuyay kachun. Chaymantami tukuy Ecuador llaktapi warmikunapak, warmi wawakunapak sinchita llankanaman kayachinchik", kashnami pushakka nirka.
Rimaypika shinallatak llaktayuktapash warmikunata tukuyshina llakichiyta, wakllichiyta anchuchinapakmi kayachirka shinallatak tukuykuna makipurashpa llankanaman, kari warmi paktakanaman, tukuyta tantachik llaktayuk kanamanmi kayachirka.
KC/pv/cg-k
Ashtawan Shuyukuna:
