Mamallakta Tantanakuypak 766 niki rimanakuy katinapi, Mariano Curicama kamachi killkak, Soberanía Alimentaria Minkarishkata pushak, tarpushpa llankakkunawanmi makipurashpa llankashpa katinapak arinirka shinami kay punchakuna tarpukkuna llakipi kawsakushkata yanapashun nirkami, kunkarishka llaktayukkunapak hatun paktaymi, Ecuador llaktata sinchi yanapakkuna, llakta tukuy ayllukunamanmi mikunakunata chayachin, shinaka, tukuykunawan yuyaypaktarishka kamachiytami allichishun, nirkami.
Curicama kamachi killkakka Código Orgánico Integral Agropecuario kamachi ruranapak killkata shuk niki rimanakuypi riksinakuypimi kashna nirka, kay killkataka, kamaypi, paktarinapi, mutsurishkapipash anchata riksishka kipami, Mamallakta Tantanakuyka wakichinapak yuyarirkakuna, yuyaykunapi shinallatak killkashkapipash llakikunata charishkamanta.
Tawka wankurimanta kamachi killkakkunami tarpukkuna hatun llakipi kawsakushkata shinallatak paykunata yanapanapak kamachiy illashkatapash riksirirkakuna, allichishka kamachiyka pakta yanapaytami tarpushka uchilla llankakkunaman chayachinka, runa llakta wakchayaytapash anchuchinka. Shinallatak tarpukkunapak willayta kunan pachakama allichinkan, yakuta, unkuchik kurukunata, unkuykunatapash yachaywan chimpapuranka, shinallatak makipurashpa mushuk yuyaykunata sinchiyachinkapak, murukuna wakichinata mirachinapak, yapata kimichinapak, tarpuy alli paktaytapash chayachinapakmi kan, nirkami.
Kay rimanakuy ukupimi, kamachi rurana killkata wakichinapak mañarka, mañaytaka tukuykunami arinirka, 124 ari apushitaywan chayamuk kamachi killkakkunaka arinirkakuna.
Shuktapika, Mamalllakta Tantanakuypika Ley Orgánica del Consejo de Participación Ciudadana y Control Social kamachi mushukyachinapak llankaywillaytami shukniki rimanakuypi riksirkakuna, kaypika Nunamunaykunatapash Acción Afirmativa paktarinata shina riksinapak kimichin, Transparencia, Participación Ciudadana y Control Social Minkarishkapimi allichirkakuna.
Rosa Belén Mayorga kamachi killkak, llankaywillayta riksichik, kamachi rurana killkata wakichinapak mañay chayachikka Minkarishka ukupi rimanakushpami riksirkanchik ishkay killka kamay churashka ña mana kamachiwan paktarinchu, 2018 watapimi llaktayuk taripashkapi shuktakyachishka karka chaymantami kay Participación Ciudadana tantanakuypi rimarik ayllukunataka llaktayukpak apushiywanmi akllarinkuna, yachashkawan mishanakushpaka ña mana akllarichun, ñawpami kashka karka. Mamallakta Tantanakuypi tukuy kamachi killkakkunami 125 ari apushitaywan wakichinapak arinirkakuna.
JLVN/pv/cg-k
Ashtawan shuyukuna:
