Mamallakta Tantanakuyta pushak, Virgilio Saquicela, kay chillay 1 puncha raymi killami willachik antakunawan rimanakurka; Mamallakta Tantanakuy kay awkarin tuta paktarishkakunaka kamachiykunata katishpa rurashkami kan, shinami Ley Orgánica de la Función Legislativa kamachiyta shinallatak Mamakamachiytapash rikurashpa llankarkanchik, kay Hatun Tantanakuy ushaykuna charishkata paktachirkanchik, nirkami.
Achikyachishpa willarka, ashtawnka, Guadalupe Llori kamachi killkata pushaymanta llukshichiyka llaktayukkunamanta akllashka kamachi killkakkuna paykunapak ushaywan ruraywan kamayta katirashpa rikushkami kan, Mamallakta Tantanakuyta pushanapak kallarishpaka, Llakta pushakkunawan, wankurikunawan, llaktay tantarikunawan, rimanakushpa makipurashpa llankanapakmi kayachini.
Mamallakta Tantanakuyka mamakamachiypi shinallatak kamachiykunapipash rikuchishkamantami kamachiy ruranapi shinallatak ñawinchinapipashmi llankakunchik. Pushakka kashnami kutinpash nirka, shinallatak Mamallakta Tantanakuy rimanakuyman kay chaska punchapakmi kayachisha, kaypimi Ley de Uso Legítimo de la Fuerza kamachiy rurana killkata allichishun; shinallatak, llaktayukkunata chaskinapika Policia Nacional tantanakuy pushakkunami chayamunka, paykuna mutsushkatami riksichinka. Ashtawanka, kay kamachiyta allichinapakka wankuri pushakkunawan shinallatak llaktay tantanakuy pushakkunawanmi rimanakushun, nirkami.
Kutinpashmi nirka llakta ancha mutsushka llakikunata chimpapuranapakmi llankashun chaymantami, 25 kamachi rurana killkakuna, shukniki rimanakuypi riksinapak llankaywillayta charikkuna shinallatak ishkayniki rimanakuypak charikásh, shamuk 60 punchakuna ukupi allichishka kachunmi mashkakunchik, nirkami.
Llaktayuk chaypikanapakka rimanakuymi shuklla ñan tiyan, kashnami, Virgilio Saquicela pushak nirka, llankayta rikuk kamachiymanta rimashpa, kamachiy rurana killkata chayachina ñawpaka, llankakkunawan, llankayta mana charikkunawanmi kallaripika rimanakushun, kayshina chikanyachik yuyaykunata shinallatak yuyaypaktarimanpash chayashun; kayshina llankanapakka Mamallakta Tantanakuy tukuy paskashkami shuyakun, nishpami willayta puchukarka.
PV/cg-k
Ashtawan shuyukuna:
