Sinchiyta rimanakushka kipa, kimsa puncha ukupi, 109 kamachi killkakuna rimarishka washami, Mamallakta Tantanakuyka Llakta pushak, Guillermo Lasso Mendoza, runata llaktapi ancha llakikunata hatun atirinakuykuna tiyan nishpa Mamakamachiypak 130 niki, 2 yupay killkapi shinallatak Ley Orgánica de la Función Legislativa (LOFL) kamachiypak 51 niki killkapi rikuchishkata katishpa llankaymanta llukshichinapak mañashkata mana arinirkakunachu.
Rimanakuy puchukashka kipa, Mamallakta Tantanakuyta pushak, Virgilio Saquicela kamachi killkakka, Fernando Cedelo kamachi killkak shuk yuyarinakushka killkara arinichun chayachishkata apushitayman kayachirka, kay killkapika Llakta pushakta llukshichinapakmi mañakun, Mamakamachiypak 130 niki, 2 yupay killkata paktashpa, kay mañayka 80 ari, 48 manapi, iskun mana apushitashkatami paktarka.
Apushitayman kayachinapak ñawpaka, Virgilio Saquicela pushakka Killkakamayuktami Llaktapak llankaywasikunamanta, kay Consejo Nacional Electoral tantanakuymanta, mitsarinapak tukuy riksichishkata katishpa Llakta pushak, Guillermo Lasso runa mitsarichun killkapi chayachishkata riksichichun mañarka.
Kay 28 awkarin tutamanta shinallatak chishi raymi killapipash 39 kamachi killkakkuna riksichishkapika, Mamakamachiypak 130 niki killkata paktachishpaka llaktapak llakikunata allichinapak shinallatak llaktayuk chaypikanapak ñan mana kanchu nirkami.
Rikuchirkakunapashmi kay kamayta, llaktayta, llaktayuk chaypikanatapash paktashpa yallinawanka llaktayuk pushakkuna akllanatami kutichin, mushuk kamachi killkakunaman, mushuk llakta pushakmanpash nirka. Chaymantami kayshina paktarinakuyka llaktata wakllichina yuyaywan rurashka nishpa mana riksinachu kan, nirkakunami.
Ashtawanka, runa ayllukunapak kawsayta mutsushkatapash mana uyashkatami shitarirkakuna, rimanakuyman mana paktarisha nishpa, ashtawankarin, kay rimanakuyman runa ayllukunapak tantanakuyta pushak Confederación de Nacionalidades Indígenas (Conaie), Leonidas Iza rimarikta mana chaskisha nishkamanta.
Kayshuk wankurikunamantaka Llakta pushakka rimanakunapak shuyakunmi nirka, Conaie tantanakuy tawka mañashkakunata arinirka, ashtawanpash, Cuenca llaktaman hampi wayra chayanatami kay llakichiy wakllichiy atirinakuyka paktarka shinallatak Antisuyu llaktapi ashnakkuna aparikuktapash wakllichirkakuna, kaypimi shuk awka runa wañurka, chaymantami Llakta pushakka rimanakuyta harkachirka, nirkakunami.
Mamallakta Tantanakuyta pushak, Virgilio Saquicela, tantaripi rimarishpaka, chimpapurakkuna rimanakushpa katinami kan nirkami, kay wacha puncha Mamallakta Tantanakuy kayachishkamanta kallarirka, ñami tawka yuyaykunata paktarirkakuna. "Kay llaktapi llakita allichinapak ashalla tatkikunami illan, ashnakkunata ashtawa yanapanapak mutsushkata rikuna illakpika, llakta chikanmanta chaskishka kullkikunata churanatami rikuna paktarinka" nirkami.
EG/pv/cg-k
Ashtawan shuyukuna:
