Mamallakta Tantanakuypi, 138 ari apushitaywanmi, Llakta pushak kay Ley Orgánica de Telecomunicaciones kamachiy mushukyachina killkata allichinaman kachashkata tukuy hapirkakuna, kaypi rikuchishka yuyaykunaka llaktapak llamkay wasikunata chaparanamanta shinallatak llikaman paktanata kichkiyachinamantami riman.
Allichinapak kachashkata yuyaypaktarishka kipa, Mamallakta Tantanakuyka Kamachiy Kipukmanmi willachichun chayachinka, Ley Orgánica de la Función Legislativa kamachiypak 64 niki killkata rikuchishkata katishpa.
Llamkaywillayta riksichik, Valentina Centeno kamachi killkakka, kay kamachiywanka Ecuador ayllu llaktaman, saywa llaktakunaman shinallatak kitimanta-karuyashka llaktakunaman llikata chayachinapakmi yanapan. Kayshina yanapaytaka karuyachikpi llamkan wasikuna 1% paktsak kullki yanapashkawanmi paktarishun nirka.
"Pakchiyachayta yallishpa, llaktayukkuna pakta yanapayta, pakta wiñariyta shinallatak wamrakunapash yanapayta charichun munaymi. Kay XXI patsak watakunapi, kayshina yanapay charinaka mana hatunkunallapakchu, shuk hayñimi kan", nishpami puchurkarka.
Kay yuyaykunata hapishkawanka, telecomunicaciones yanapayta chayachinapak, llaktapak llamkaywasikunaka "llaktapak llaktaytami katirana kan kay telecomunicaciones pushay ukupi shinallatak katirayachik shinallatak chaparak tantanakuykuna riksichishka kamachiyta katishpa.
Shinallatak, imashinalla llamkaykuna kay llikaman kichkiyachinapak paktarinata rikuchiytaka kay kamachiyta paktachichik uchilla kamachiypimi churashka kanka.
Puchukaypika, "Telecomunicaciones pushakkuna shinallatak paykunata rikurak shinallatak chaparak llamkaywasimi kayshina ñawpayuyay paktarichun tukuy ruraykunawan paktarinka"
AM/cg-k
