Mamallakta Tantanakuy, 81 ari apushitaywan, ishkayniki rimanakuypimi Mamakamachiypak 110, 115 niki killkata mushukyachinapak killkata arinirka, kaypika llaktay wankuriykunata shinallatak pushak akllarinapak riksichiynapak kullkita anchuchinatami rikuchin, shinaka, kaypika Especializada Ocasional Minkarishkapimi llamkaywillayta allichishkapimi kimirishpa llamkarkakuna.
Esteban torres, minkarishkata pushak, kay llamkaywillayta riksichikka, kay 2008 watamanta kunan punchakunakama 263 hunu dólar kullkitami pushakkuna akllarinapak, shinallatak wankurikuna kawsanapak chayachishka, shinaka tapurirkami: "¿llaktayukkuna alli paktarinapak shinallatak llaktay wankurikunapak mashnatak alli kashka?".
Kay minkarishkapika 1945 watapi killkashka mamakamachiymanta kallarishpami tukuy allinta rikushkanchik, kaypimi Tribunal Supremo Electoral tantanakuyta wiñachin kaymi pushakkuna akllanata rikuranka, kay 2008 watapi killkashka mamakamachiykama shinallatak Código de la Democracia kamachiypash. Nirkami, llakirinimi, llaktaywankurishkaman chayachishka kullkika llaktayuk pakta chayanapi mana yanapashkachu, chaymantami tawka llaktay wankurikunaman chayachina kullkita anchuchina, shinapash mana tukuykunata kichunachu, nin.
Mamakamachiyṕak 110 niki killkata mushukyachishpaka:
"Art. 110 niki. Llaktay tantanakuykuna shinallatak wankurikunapash paykunaman kimirishka, killkarishka shinallatak munak ayllukunapak kullkiwan yanaparinka. Llakta wankurikunaka pushakkuna akllarinapi ishkay kutin tukuy mamallaktapi apushitashkamanta pichka pasakta mana paktakpi, llaktay tantanakuykunapak hayllikunata shinallatakmi paktarinkakuna.
Kay 115 niki killkamantaka, kay killkatami kimichinapak mashkakun: "Art. 115. Mamallaktaka, willachik antakunawan, tukuykuna pakta pakta willayta riksichichunmi yanapayta sumaychanka.
Mamallaktapak charishkata shinallatak tiyakkunatapash mana hapina ushanka, llaktapak willaypipash mana riksiriy ushanka, tukuy pushaykunapi, shinallatak pushak akllarina ukupi.
Kay rikuchishkakuna mana paktachikpika kamachiyta rikurashpami wanachishka kankakuna shinallatak riksichinapak churashkapi, pushak akllarinapak kullki tukuchiypi chaparanapa ruraykunata churanka".
Kay rimanakuypika, 18 kamachi killkakunami rimarirka, llaktakunapak charishkata ama hapichun shinallatak wakinpilla rikurik llaktay wankurikunapash pushakkuna akllarina pachallapi rikurikkunaman ama kullkita chayachinapak tawkakuna rimarirka. Chayshinallatak, mamakamachiypak 110, 115 niki killka chayshinallatak sakirichun mitsarikkunapash nirkami, pushakkuna akllarinapi tukuykuna pakta riksirinatami yanapanka, nirkakuna.
Yuyarinami paktarin, mamakamachiypak 442 niki killka rikuchishkapi, mushukyachishkata arinishka kipa, tukuy llaktayukkuna arininami mutsurinka.
EG/cg-k
Ashtawan Shuyukuna:
