Ayllullaktata pushakkuna, Mamallakta Tantanakuyta pushakkuna, kamachiy killkakkuna Tukuylla Tantaripi karka, paykunaka Yaku Kamachiytami rimanakurka, Tungurahua markapi tantarirka.
Tukuylla Tantaripika: 9 tantarikunamanta, 19 pushakkunami tantarirka, Tungurahua markapi, Ambato llaktapimi karka. Paykunaka Yaku Kamachiytami rimanakurka, kamaywasi ukupi kachun nirka; kikinllatak kamana, ayllullakta yaku tantarikunallatak kamachun, yakupak kullkita tiyachun nirka; Yaku Kullki Wiñariyna; yaku mana shukpaklla makipi sakirichun; arinina pachakunapi runakuna chaypi kana nirka.
Chirli yakuta, parkuna yakuta nikina hawa, urkukuna ukllana, wakaychina; shuktakkunatapash rimarkakuna.
Miguel Carvajal, Soberanía minkashka, kunan Yaku Kamachiyka ishkaychunka watata yallitami charin, kaypakka mushuk uchilla kamachiymi mutsurin, kunan pachapi mañaykuna tiyashkatami rikunka, chayka: yaku pukyukuna chakirikushkata rikunka, chirikunuk shuktakyarikushkamanta allpapachapi llakikuna tiyashkatami rikunka.
Kamachiy killkakka urkukumanta, yaku pukyukunapi shachakuna pakirikushkamanta punchanta llaki tiyaktami rikuchirka.
Kay tantarimanka, Conaie tantanakuymanta, Humberto Cholango pushakmi kaypi karka, markapi tukuylla tantarikunaka maymutsurikmi kan nirka, tantanakuykuna, yaku tantarikuna kaypi kashkamantami may mutsurik kan. Ashtawanakarin Soberanía Alimentaria minkashka kaypi kakpimi may mutsurik kan nirka.
Kaypi rikuchishkakuna Yaku Kamachiypi yaykurichun, runa pushakka mañarka, shina chay llakikuna ama kutin tikramuchun nirka. Pachamamaman, yakuman, allpaman yaykurinkapa manyayachi, tsiknikuna ama tiyachun nirka.
Rimaykuna
Barbarita Baltazar: parkuna, mikuna yakupak chanimaru mana tiyanchu nirka. Ashtawankarin urkukunata kamanami maymutsurik kan nishpa achkata rimarirkakuna.
Ángel Punina: kay mushuk yaku kamachiyka yakuta charik tukuy ayllullaktakunapimi riksichina nirka. Yaku tumata charik urkukunata kamankapa kullkimi tiyana, parkuna yakuta charinkapa, mikuna yakuta charinkapapash kullkimi tiyana kan nirka.
Marcelo Toaquiza: shulkakunapi riksichina mutsurinmi nirka, urkukunata wakaychishpa charinaka tukuylla kamaywasipak makipimi kana nirka.
Manuel Ainaguano: yaku kamachiymanta ñakarinaka pichka watamantami sinchiyamurka nishpa yuyarirka, chayka runa ayllullaktamanta, paklla ayllullaktamantami rikurimurka, paykunami yaku ama shukpalla makipi sakirichun kaparirka; Consejo Nacional Plurinacional del Agua tantanakuypika runa ayllullaktamanta, paklla ayllullaktamanta chaypi kachun nirka; shinallatak tukuylla kamaywasikunapipash runakunami chaypi kana, paykuna arinichun nirka.
Juan Espinoza: yakuta kamak tantarikuna kikin llankayta, kullkita chinkakun nirka. Urkukunata kamanaka shuktak makinchikuna wiñarishka. Kay yachaywanka Tungurahua markami kallaripi taririn nirka.
Segundo Gualasín: yaku llikata kamachun cabildos pushakkuna katichun nirka; ashtawanpash llaktakuna ama tarpuna allpata yallishpa tarpuchun shuktak mushuk ñankunata mashkana, shina ama urkukunata wakllichichun nirka.
Magdalena Caisabucha: 73% patsakri yaku, allpapash charikkunapak makipimi kan, l 27% patsakrillami paklla runakunapak makipi kan nirka, pakllakunamanta murukuna kitikunaman llukshikta paykunaka yachanmi nirka.
Yakuta, allpata rakina hawa, urkuta aman wakllichinkapa, parkuna yakuta, mikuna yakuta charinkapa kullki tiyachun arininami nirka. Yakuta ayllullakta kamanata, kititantariman, marka kamachikman mana yallichina nirka. Ayllullakta kamaytami ashtawan sinchiyachina, pushakkuna shina nirka.
Markapi Tukuylla Tantarika, Rosario Mera Iturralde del Centro Cultural Eugenia Mera wasipi, Ambato kitipimi karka. Chaypika: Miguel Carvajal, Soberanía Alimentaria Minkashkata pushak; shinallatak Marcia Arregui, Nelson Serrano, Mongómery Sánchez, Ramiro Vela, César Umaginga, Betty Carrillo, Betty Jerez, Elizabeth Reinoso kamachiy killkakkuna kaypi karka. Lira Villalba marka kamachik, Humberto Cholango Conaie tantanakuyta pushakpash kaypi karka.
Kay chaska puncha: Chimborazo, Pichincha markakunapimi katinkun.
RSA/am/jc-kichwa
