Kay Turismo Pushak, Lorena Tapia y de Transporte, Paola Carvajal hatun kamachik, kay Régimen Económico minkashkapi rikurishpa, antankapi purinkapa kullki pankakuna illan nirka, kay llaki tiyakpimi tukuy llaktayukkunaman mana paktan nirka, mana kullkimantachun kan, purina pankata katunapimi kan, tukuylla llaktay yanapayta churanami illan.
Mamallaktapak kamachikkunaka Aviación Civil kamachiyta, Turismo kamachiyta rikuchunmi kayarka, shinallatak antankapi purina kullkita rikuchunmi kayashka, kay mushuk kamachiyka Oswaldo Larriva kamachiy killkak churashkami kan.
Kay Lorena Tapia kamachik wakin llaktayukkunapak, antankapi purina achka kullkimi kan, tukuylla llaktay yanapaytami mashkana alli kan nirka: TAME antanka, Mamallaktapak kashpa, mana mintalak antanka shina kullkitapash hapinachu kan, mana shina llankanachu kan nirka.
Kutin, Transporte Hatun kamachik, Paola Carvajal, antankapi purina kullkita ista llaktakunawan paktami kan nirka, chaymantami minkashka hatun kamachikkuna chaytaka rikunata charin nirka, pachata mana chinkashpalla chayanatami rikunata charin, antankapi purikkunata allita chaskina kan, TAME antankami ashtawan allita chaskina kan, chay antankatami llakta ukupi imashina llankakta rikuy kallarishka.
Kunanka, pawana sayllakunami rantinchirishka, rikushka sayllapi chayachun chapanchik, purikkunaman ama manchayta churanachu, ashtawankarin kamanami kan.
Kay minkashkata pushak Virgilio Hernández, kamachiy killkak, yanapankapa rantika, wakcha runakunata llakichishpami tukurinka nirka, antankayuk llankaywasikunaka mana yalli kullkita churanachu kan, yalli kullkita mana hapinachu, yanapashpa harkankami. Mamallakta ukupi riksishpa purinatami ashtawan harkanka, kunanpika riksikkunami Mamallaktaman achka kullkiwan yanapan nishpa rikuchirka.
Paypak yuyaypika, Mamallaktapak hatun kamachikkuna rimashka allimi kan nirka, purina pankata rantinapi llaki tiyakpika, chay llakita allichinkapa shuk ñanta mashkana kan, tukuylla llaktayta mashkana kan nirka, antankakuna achka ushaywan llankachun nirka. Mamallaktapak antanka wakinpika mintalashpa llankayka, payta mana yanapankachu, ashalla kullkimi yaykunka nirka, runakunata yanpankapa allimi kan.
Minkashkakuna shamuk punchakunami Aviación Civil mushuk kamachiyta, Turismo kamachiyta allichinkapa tantarinka, chaypimi antankapi purina kullkita rikunka, chayta rikuk tantarikunapak, yaykurishka kamaywasikunapak, Mamallakta Tantanakuypak yuyaykunata hapishpa rikunka nirka.
JLVN/pv/jc-kichwa
