Pawkar killa, 2011 watamanta shamuk Educación Intercultural hatun kamachiyta allichishka kipa, Mamallakta Tantanakuypak Yachayta minkashka, sumak yachay tiyachun kay kamachiyta allichinami mutsurin nirka, yachachikpak kawsayta allichinami mutsurin nirka. Chaymanta Miriam González Mamallaktapak Hatun tanaripi kay kamachiy mashkakta rikuchirka.
Kay kamachiyta llaktakunapi riksichishkatami yallita rimarkakuna, llaktakunapi iskun yachayta yachachikwan rurashka willarka, kamachiy killkakkunawan atinakushkata riksichirka. Kaykunata rimarishka kipa iskun nikikunata , kimsa hatun churashka nikikunata allichina kan nirka, kaykunatami Mamallakta Tantanakuypi rimanakushka karka.
Shinapash, González kamachiy killkakka, kunan llankakuk kamachiypash achkatami yachayta mushukyachinkapa yanapashka nirka, shinami Ecuador llaktata shuktak llakatakunawan chimpapurashpa allita rikuchishka nirka. Minkashkakuna México, China, Argentina, shuktak Mamallaktakunata chaskishka, Mamallakta wiñariykuytami rikuchishka nirka.
Kay kamachiywan shayarikuna karupimi sakirirka, chay watakuna kaparina allimi karka, yachachikkunata riksinkapa tatkita kushka: mushuk kamachiy 2011watapi mana llankakpika, yachakukkuna 208 dólar kullkitalla hapik karka, kunanka 500 kullkitami hapin, kay kamachiyta ashtawan allichishpaka 775 dólar kullkitami hapinka. Kay kullkiwan yachachikkunapak kawsaymi allichirinka, shinami kamachiy arinirichun pushak kamachiy killkak rimarka.
Kay kamachiy mushukyayka llankana saywakunata rantinchimi ashtawan alli rikurirka. González kamachiy killkak pusak sayllayka mana yachanawasipilla llankaychu kanka, kunankamami shina karka, ishkay sayllataka yachachina wasimanta kanchapimi llankana kan. Kay pachataka yachay mushukyachina, yachana, pushakkunawan rimarinakuna, llankayñanta rurana, shuktak llankaykunatapash ruranka. Imamantapash yachachina llikata mana llakichinkachu.
Yachayta allichinka, Minkashkapak rikuchika tawka yuyaykunapimi tiksirin, yachaypi llankankapa Hatun Yachayta charishka pankatami charina kan. Yachachikpi shutirishka pankata mana charik runakunaka, chusku patapi amawta yachayta charinkapa kimsa watata yachanata charin. Shinallatak rurayyachay pankata charikkuna yachachik tukushkakunaka imashina yachachinapimi sumak yachaykunata katinka.
LM/jc-kichwa
