Chay Chimborazo markapak achka llaktakuna, runallaktakuna, sapsikuna, ayllullaktakuna manarak allpa kamachiyta arinikpi, tukuykuna atinakunkapa waranka yalli runakuna tantarirka, chay Consejo Provincial wasipimi tantarirka.
Kunankama 21 rimanakuyta rurashka kan, chayman pichka waranka runakuna riksishka, shinami Mónica Alemán kamachiy killkak rimarka, payka Nelson Serrano kamachikpak rantimi llankakun. Kay Comisión de Soberanía Alimentaria pushakuyka, shamuk hunkami Pichincha markapi tukurinka. Kay llankayta tukuchishka kipami shuk willayta killkana kan, kay willaytaka tukuy Mamallaktamanta tantarishpami rimanakuna kan, kayta manarak ishkaykutin atinakushpami katinka, shinami César Umajinga rimarka.
Llaktayukkunapak yuyayta, munayta uyanaka may allimi kan, shinami may alli kamachiykuna killkanata ushanchik. Kay Chimborazo markapika sinchitami rimanakurkanchik, kay tantaripi markata mana hawata yallinata ushanchikchu, shinami Rosa Elvira Muñoz kamachiy killkak rimarka, payka kay kamachiytami killkakun. Manarak, kay tantarita charishpa ñami 10 kutin kay kuskapi tantarirkanchik, chikan chikan shulkakunapi, kitikunapimi ña tantarirkanchik.
Kay tapuypika, minkashkapak munayka mana yuyaykunatalla, mañaykunatalla hapinachu kan, imakunalla mushukyanatami hapina kan. Kallari llankaypika, Chimborazo marka tawka yuyaykunawanmi yanaparka, tawka warmikunami allpata kamachiywan shutichishpa kuchun, kullkita mañachichun mañarkakuna, chaytami kallarik atinakuypi hapishka kan, shinami Rosa Elvira Muñoz kamachiy killkak rimarka.
Tawkamanta shuk rimanakuyka, kay Mamallaktapi kawsakkunaman, shamuk runakunaman achka mikunakuna tiyachun chaskishka kan, shinami César Umajinga kamachiy killkak rimarka, payka kayta rikuk Minkashkaman yaykurishkami kan. Kay kamachiyka allpakunata kamachiywan shutichishka kachun, ashtawankarin uchilla tarpukkunaman allpata yallichichunmi kan nirka.
Kay kamachiytami Ecuador llaktapi kawsak runakuna kaparishpa mañankuna. Kay kamachiyka allpa tukuykunaman kachunmi munan, allpa ama shukpaklla makipi kachunmi ñakarin, kay allpakuna runakunata mana yanapakpi, pachamama kawsachun mana yanapakpimi shina rurana, shinami Alemán kamachiy killkak rimarka. Allpaka murukunata, llankayta kunatami charin, pachamamawan mashiyarinami kan, shinami pakllapi kawsak runakunaka allpapi pukuchishpa charinka, pukuchishpa katinkapa kullkita charinka, kunanka kamachiy killkakkunapak llankayta mana killkana ukupilla kanchu, llaktakunapi riksichinami kan nirka.
LM/pv/jc-kichwa
