Simiátug llaktapak kamachik wasipi runakuna huntarka, ayllullaktamanta runakuna, yachakukkuna, markama, kiti, shulka kamachikkuna chaypi karka, paykunaka Mamallakta Tantanakuy chaypi rimanakuyta charichun, runakuna yuyayta kuchun, 154 wata yallina kashka rikuchirkakuna.
Mamallakta Tantanakuy achiklla llankayta rikuchinkapa, saywakunata pakishpami kay llaktaman chayamushka nirka. Kamachiy killkakkunapak rimaykunata uyashpa, Mamakamachiy Mushukyachun mañarka, kay llankayka Mamallaktata mana wakllichinchu nirka, kay llankayta Mamallakta Tantanakuy pushachun nirka, shina rurachun yanapan.
Kay rimanakuypika: Juan Carlos Cassinelli, Verónica Arias, Marcela Aguiñaga, Rosana Alvarado, Hólger Chávez, Rosa Elvira Muñoz, Gabriel Rivera, Fausto Cayambe, Ricardo Moncayo, Fabián Solano kamachiy killkakkuna karka, sapankunami katin katin Mamakamachiy mushukyarinamanta rimarkakuna, shinami runakunaman achiklla sakirka.
Simiátug llaktamanta 17 pushakkuna, kamachikkunapash Ecuador llaktaka kawsaypurata, tawka kawsayta charikmi kanka nirka, kunanmi runa llaktakunata uyankapa rikurin nirka, shinami shuktak Mamallakta kan, alli runakuna tukukun.
Tawkakutinmi Mamakamachiy ama mushukyachun, wakaychichun mañakta uyanchik, allinta rikukpika mayhan nikikunapash mana Mamallaktata wakllichinchu nirka, ashtawankarin tukuykunaman muskushka Mamallaktata wallpanatami rikuchin.
Kutintak akllanamanta, kawsaykamaymanta, mashna watata charishpa akllarina, hatun tapuymanta, willay tukuykunapak kashkata allitami achikyachin nirkakuna. Kunanka mayhanpash Mamakamachiy mushukyanata mana pantachinkachu, shina rimashpa charirayarka.
Kari warmi Mamallakta Pushak tukunkapa, mashna watata charina hawa, akllarina kak runa amawta yachaytami charina kan, chaymi Mamallaktata Pushanata ushanka nirka.
Luis Martínez, Simiatug shulkata pushak, 12 waranka runaknapak shutipi, Mamakamachiy Mushukyachinata Minkashkata Pushak, Juan Carlos Cassinelli kamachiy killkakman, pichka mañayta charik pankakunata makipi charichirka, kay llaktatapak, Bolívar markapi sakirik, Guararanda llaktamantra 74 waranka tupu ñanta rurachun mañayta charichirka, chayta Utkachik kamachikman yallichichun mañarka.
Chay mañaykunaka Simiatug llaktapak kullki muyuy yanapakman kimirishkami kan, ashtawanpash kay Instituto Teconológico Superior Shimiatug Kunapak Jatun Kapari yachana wasita riksichun nirkakuna; shinallatak Felix A. Granja yachana wasipak 14 yachana ukukunata rurayta tukuchichun yuyachirka; milenio yachana wasipak illakkunata tukuchichun nirka, shulkapak shuktak yachana wasikunatapash tukuchichun nirka.
Allikawsay hawa, kay Simiátug llaktapi ima punchakama kay B wasishina rurarishka kanchun shuk tapuyta churarka; chaywan ayllullaktakunapi hampishpa katichun rimarka.
Anta hatun ñanta ruraypi, Salinas-Simiatug; Río Blanco-Simiatug-Quishpe Mendina, llaktakunaman alli ñankunata rurashpa tukuchichun mañarka, kunanka llankaykuna samarikun nirka.
Shulka pushak, chaypi kak kamachiy killkakkunata yupaycharka, kunanmi kayshina tantanakuyta rurashkanchik nirka, mana Mamakamachiyta mushukyachina hawalla kanchu, imashina chay runakuna kawsakta riksirka, ashtawankarin paykuna ima yuyayta churakta, kipaman ima yuyayta charikta riksinkpa allimi kan nirka.
JLVN/pv/jc-kichwa
