Kay chusku punchata, José Mejía Lequerica ukupi, Quito llaktapi tiyak 11 pakta yachana wasikunamanta shamuk yachakukkunata chaskin, paykuna SEK NUVA mushuk ñanta rikuchin, (ONU) tantari mushuk ñanta mirachishpa rikuchishkami kan.
Kay SEK NUVA ñanka, pichkakutinmi llankashka, tawka istallaktakuna kachashka tantarishka pakta runaknami kan, kay hatun tantaripika pachamama llakita, allpapachapi kullki llakita tawka rikuywan riksichirka.
Mama, Gabriela Rivadeneira, Mamallakta Tantanakuyta pushak, pakta runakunata allishamuyta kushpa, paykuna allpapachapi tiyak llakikunata allichinkapa, shuk mushuk ñanta riksichikpi achkata yupaycharka.
Chay makanakuykunawan, wakllirikunawan, yarikaykunawan tawka Mamallaktakuna kawsay, wamrakuna kashkamanta, kunan pakta runakuna kay llakikunata rikuna kanchik.
“Achka purik runakunamanta, tawka runakunami wañushka, paykunaka wañuymanta mitikushpa shuktak llaktakunaman llukshishkakuna kan, paykunaka achka kullkita mashkashpa chay llakiman yaykurishka”, nishpa rimarka.
Charishkakunata mana pakta pakta rakishpami hatun llakikuna tiyan, Guevara shina nirka, yapa wakcha rikurin, tiksi mutsuykunatapash mana paktachishka kan, ista llaktakunapi yalli kullkita charik runakuna rikurin, chay llakikunata tukuy Mamallaktakunapimi tiyan nirka.
“Shuk samilla yuyashpaka mana llakimanta llukshishunchu, NN.UU chaniwan yuyashpami achkata yachanchik, chaymi llakikunamanta llukshina ñanta paskan. Shina rimanakuykunami ancha llakikunamanta llukshinkapa shuk yanapak yuyayta kun. Tawkasami kawsayta, hayñikunata, chikan chikan yuyayta sumaychachin, kishpiyrishka yuyayta charichun rikuchin”, shinami Bullock rimarka.
Kay SEK NUVA yachaypika, 140 yachakukkunami yaykurishka kan.
LM/JS/jc-kichwa
