Chunka watakuna llankashka kipa, Rafael Correa Delgado apuk, imalla llankashkata llaktaman riksichirka. Llakta pushakka Mamallakta Tantanakuyman 09:56 pachami chakiwan purishpa chayamurka. Paypak warmi Anne Malherbe; paypak mama, Norma Delgado, churi Miguel, Mamallakta Tantanakuypak wasi ukupi shuyakurka.
Llakta Llankashka willaypika, ista llaktamanta runakuna, tantanakuykuna, Comando Conjunto de las Fuerzas Armadas, parlamentarios andinos, llaktapi llankakkuna, apaukkuna, tantanakykunapash chayamurka. 09:37 pacha tutamanata Lenín Moreno, Ecuador llakta ñawpa kipa pushak chayarka. Pay chayakpika tukuy ayllukunami shayarishpa naparkakuna.
Kallaripika, Gabriela Rivadeneria apuk rimarka, Mamallakta Tantanakuypi imalla llankay paktashkata riksichirka. "Kay watakuna llankaypika 47 kamachiykunata arinishkanchik, rikukpika 15 kamachiy watapi rurashka shinami kan. kayshina llankayka Mamallakta Tantanakuy pakta llaktayukwan llankaymi rikurin, mana mashna kamachiy rurashkamanta, ashtawanpash kay kamachiy mashna yanapak kashkamanta" nirkami.
Gabriela Rivadeneria apukpakka, llaktayukta yanapay, allpa, yaku, Código Monetario kamachiykuna rurashpa llankayka llaktayukta yanapanapak, kasiklla kawsyata rikunkapak, kamay pakta kachunmi kan. "Ñukanchik llankayka llaktayukkuna kikin hayñi paktanapi llankaymi, llaktata kuyanchik kay yuyaywanmi pakta kanchik. Llaktapi llankayka makipurashpa kanami Ecuador llaktapi mushuk yuyay" nirkami.
Llakta pushak willashka
Llakta pushak Rafael Correa apukka punkara mintalay ashayashkata, kay 16 puncha ayriwa killa allpa chukchuy llakichishkata rimarirka. "Manchanay rurayta rurasha mana ninichu, shinapash ñawpakmanka llukshishunmi, kay punchakuna sinchiy kawsay kashkata yachashpapish" nirkami.
Llaktapi llankaykunawan kullki wakichiy tiyashkatapash rimarka, ñankunata rurashkanchik, kayshina llankaywanka 1300 waranka hunu dolar kullkitami wakichishkanchik, shinallatak 1.200 waranka hunu dólar kullkiwanka zirma wiñachina wasitami rurashkanchik, nirka,
Llakta pushak Rafael Correa apuk runaka kay shamuk punchakuna sukta llankana wasikunata anchuchishun, shinallatak 1.000 llankak charik llankana wasikunallami ishkay kipa pushakta charina ushanka, nirkami.
Zirmapi llankaymanta
Shinallatak, Jorge Glas, llakta kipa pushak, zirma wasikuna ruraypi mashna kullki churashkata willachirka, kayshina llankayka utkashpa wiñariymi kan nirka. Punkara llankaypi kullki churashkatapash riksichirka.
Suyu llaktapuramanta rikukpi Ecuador llaktami zirmapi chinkariyta ashayachishka, kayshinami Banco Interamericano de Desarrollo tantanakuypak willaypi rikurin, llaktapak kullki ashtawan yaykushkami riksirin, nirkami.
Glas apukka, kay suyullaktapuraka ñukanchikmi zirmata mintalaypika kallaripi kanchik. "Allpapacha llaktakunaman zirma wiñachik wasikuna rurakrinchik nikpika umachinkashka kankichik nirka, mushukyay kallarirka, kunanka ushay mushukyayta rikukunchik, allpapacha llaktapura riukuypika pichka nikipimi kanchik".
Wasichiy Yachaypash
Sandra Naranjo, Planificación y Desarrollo killkakamayuk, Ecuador llaktapi, hampina, yachay, kasiklla kawsaypi llankashkata rimarka, llaktapak llankaymi kana kan, nirka. "Llakta pushak mayhan kashpapash, hampinapi, yachaypika mana mintalay tiyanatami rikuna kan".
Hampinapika, ñawpa llakta pushakuna tantanakushpa churashkata yallimi llankashkanchik nirka. Mushuk wasikuna, hayllikuna, yanapaykuinatapash churashkanchik. "Kunanka Llaktapak hampinatami ayllukuna sumaychan, allpapachapi rikuchishkatami ñalla paktakunchik" nirkami.
"Kikinkunamanta, kari warmikuna, mushukyashka yuyaywan, kuyaywanmi kutin tarishkanchik, wawakuna, wamrakunapak kushiyayta paktanata mashkakunchik, muskuna yuyayta paktashkamanta, sinchita llankayka allimi kashka", nishpami llakta pushakka willayta puchukarka.
MC/pv
