Suyukunata wallpanka 20 watata uniyanka. Shinami Código de Organización Territorial, Autonomía y Descentralización (COOTAD) kamachiy ukupi Mamallakta Tantanakuy kayna puncha arinirka. Mamakamachiypi rikukpika Mamallaktaka suyupi, markapi, kitipi, paklla shulkapi rakirishka kan. Tukuri kimsaka ñami Mamallaktapi tiyan, suyukunaka mana tiyanchu.
Mamakamachiyllatak suyuta wallpankapa ishkay yalli markapash tantarinallami kanka. Kay saywashka llaktakunaka katinakuymi kana kan, 20 patsak tawatupu allpapampatami charina kan, runakuna chay llaktapi kawsanaka Mamallaktapi rikukpika 5% patsakri yallami mutsurin. Shinapash, Mamallaktapak allpapampapika 20% patsakrimanta mana yallichu kana, shinami COOTAD kamachiypak 15 nikipika riman.
Kay suyukunata wallpana yuyayka kikinllatak karupi kamachikkunapak llaktamantami llukshina kan, kay kamachikkuna paykunapak apuchiwan arinishkami kanka, kaytaka COOTAD kamachiymi yanapanka. Kipaman kikinllatak karupi kawsankapa suyu tukuna mushuk kamachiyta killkanka, kay kamachiypimi paypak suyu wiñarina, saywarina hawa hatun willayta ruranka. Kay hawa, Código Territorial kamachiy, markapak saywakunata ama shuktakyachichun harkan. Mamallakta Tantanakuy 120 punchapi arininata charin.
Kunanpi ushaykuna tiyakka mana washaman tikrankachu
Kay COOTAD kamachiyka 55 nikipak, g killka mushukyarirka, kaywan kitikunapak kamachikkuna llankanata ushanka, shina llankayñanta, samarina pampakunata, kawsaytarpuykunata, pukllana pampakunata allichinka, hampinamanta, yachaymanta mana rikunata charinchu.
LM/pv-jc-kichwa
