Kallari atinakuypi Función Legislativa kamachiyta mushukyachina kakpi, kamachiy killkakkunaka tukuylla awllikkuna llankashkata willachunmi rimarkakuna. Kay willayka llankachun mañashka paktashkakunawan kimirishpami rinkakuna, chaywan llaktayukkuna pay llankashkata katinka, riksinkapash.
Kamachiy killkak Ximena Ponce, kamachiykunata wallpanka llaktakunapi, markakunapi mushuk kamachiy killkarichun riksichishkatami ashtawankarin rimarka. Kay Función Legislativa mushuk kamachiypi kamachiy killkakkuna llaktakunapi kachunmi kamana kan, hatun rimanakuna tiyakpillami Mamallakta Tantanakuy ukupi atinakuna kanka, mana minkashkapi rimanachu kan. Kay willayta mañayka killapi, watapi llankaykunawan paktashkatami rikuchina, nirka.
Paymanta, Fernando Bustamante kamachiy killkak, mayhan Consejo de Administración Legislativa tantariman yaykurishka, kamachiy killkakta wanachinata rikushpa, payka kay wanay katikuypi mana apuchina kan nirka.
Mamallakta Tantanakuyta ishkayniki kipapushaka, Marcela Aguiñaga, hucha tiyashkamanta wanayta chaypilla sakichina hawa rimarka, kamachiy killkakkuna, Mamallaktapak kamachiypak ñawpakpika mana huchata sakichishka kana, huchata charishpaka rikuchinami kan nirka. Shina llakikuna tiyakpika minkashkakunata allichina, kutintak tantarina kan nirka.
Kutin René Yandún, kamachiy killkak shuk awllik llankashkamanta willayta mana chayachikpika wanachina nirka. Kay Unidad de Técnica Legislativa tantarika, chay Consejo de Administración Legislativa ukupi kana. Mana wanachichun mañashka ukupi kan, shinallatak ima puncha, mashna pachapi wanachinata rikuna kan, wanay sakirichun mañak imawan yanapariktapash rikunami kan.
JLVN/pv/jc-kichwa
