Ishkaykutin atinakuy kallarikpi Richard Calderón kamachiy killkak kay Sistema Nacional de Infraestructura Vial del Transporte Terrestre kamachiy hawa rikischirka.
Payka Comisión de Gobiernos Autónomos pushakmi kan, imashina kay kamachiy kunankama paktashkatami rikuchirka.
Shinallatak imashina ista llaktakunapi hatun ñan shina kachun, “kay Ecuador llaktami kay suyupi alli antawwa ñankunata charin, allita kamankapa shuk kamachiymi mutsurin”, nirka.
Kay kamachiyka kanchis wankurikunatami charin, kaypimi imashina ñankuna rakirishkata riksichin: suni, patak, llashak kashkata rikuchin nirka, unanchakunata pantarikpi llakichina hawa riman. Huchata charikpi imashina wanachina, nikina, ñanta rurana hawapash rikuchirka.
Iamashina kamachik patakuna llankanapash
Imahina ñankuna mana wakllirinatapash Calderón kamchiy killkak riksichirka, chaytaka sapan pata kamachikkunami rikunata charin nirka. “Kunanpi tiyak kamachiyka ñan kamachiymi kan, 1964 watapi killkashka kan, Mamakamachiypi ñan hawa rimashkata mana riksichinchu nirka. Ñanta charina hayñitami rikuchin, ñanta paskankapa, hatunyachinkapa Mamallakta kullkita mana churanachu. Kayta paktachinkapa llankayñanta rurana ”, Calderón rimarka.
Kunan mitapi llankak Hatun kamachikmanta ñan llikamanta rimashpa, ñankunami Mamallaktapi kullkita mirachin, charishkakuna shuktak kuskaman apankapa, mitachiwan yanapana, shinallatak ñanllikata charina may alli kanka nirka, chaymi riksikkuna Mamallaktata riksishpa purichun achkata yanapan. “ Yuyayka llaktayukkuna alli ñanta purichun yanapana yuyaywan katinami kan”, nishpa riksichirka.
MC/pv/jc-kichwa
