Wawakunata kamachiywan kamanarayku, shinallatak kikin hayñita charichun, taytamama paypak churikunata ama kunkarichun, ama shitachun, kamachiywan mañashkata paktachichun, kay Código Orgánico de la Niñez y Adolescencia kamachiyta allichinata Gilberto Guamangate kamachiy killkak rimarka.
Wawa taytawanlla, mamawanlla wiñanaka, mayhanpash mana alli allita, paktapakta yanapaymi kan nirka, taytamama kuyashka wiñashka shina mama kanchu nirka.
Wawaka mamatami ashtawan mashkan kamachiy killkak riksichin, paymi yallita kaman, paypak ranti riman, ukllan, kunukta kun. Shinallatak taytaka kullkiwanllami yallita yanapan, rikunkapa chayan, mikunata chayachin. Shina churipak mana pakta pakta kuyay kawsay chayanchu.
Chay llakikunata rikushpa, kishpiychik wawa mashna watata charishkata rikunka; ashtawankarin shuk watakama mamata ñuñuchun. Kari warmi wawa mana 12 watata paktachikpi taytawan mamawan kawsachun wamrata mañanka, shinapash shuk killakamalla sarinka.
Rikunka chayay, tayta mama imashina yuyarishkata sumaychanka, ashtawankarin kari warmi wamra, imilla munashkata mana pakina kachun. Maypimi shuk hunkata, shuk killata taytawan, mamawan kakpika, imashina tayta mama yuyarishkata hapina kan. Churita ushushita rikunaka kamachiy mañashkami kanka.
Kay mushuk kamachiyka, shuktak mama wachashkata wiñachishka wamrata rikunkapa chayana kakpi, kishpiychikmi rikunata charin, shinapash wamra paypak yuyaywan rimachun shuyana kan. Wakinpika taytamama yuyarishkata sumaychana kan, shina kari warmi wamrakuna mana musparinka, allita wiñanka.
Kari warmi wamrakuna 12 watata charikpi, tayta kashpa, mama kashpa kuyayta kushkata rikuchikpi, wamrapak yuyay alli pukurishka kakpi, imashina kawsamushkawan sakina, mana shina kakpika wamra alli kawsayta charichun mashkana. Taytawanpash, mamawanpash wamra llakita charikpika kishpiychikmi kamachiywan shuk kamak runata churanka.
RSA/pv/jc-kichwa
