Mamallakta Tantanakuyta pushak, Gabriela Rivadeneira, chay 2 puncha, ayriwa killapi llaktakunapak apuchika ushayta charirka, chayka Alianza PAIS llaktay tantarimanta, Lenín Moreno misharka, achiklla karka, runakuna apuchishkatami kaman nirka.
“Mana hamutashkamanta makanakuyman mana kayanachu kan”, shinami Rivadeneira Hatun kamachik rimarka, chinkak llaktay tantarimanta makanakuyman kayashkamanta llakirini nirka, ashtawankarin CREO tantarimanta, akllarina kipapushak, Andrés Páez shina kayarka.
Mamallaktapi akllayta pushayka “ kay Mamallaktamanta, istallaktakunamanta allinta rikushkami kashka, kallari akllay muyuypi, ishkayniki muyuypi shinallatakmi karka”, kay Consejo Nacional Electoral (CNE) kamaywasita alli hillaykunata rurachun mañarka, sapan pacha akllay katikuyta rikuchun yanaparka.
Hatun kamachikpak Alianza PAIS llaktay tantari, takarik CREO tantarika 41.000 rikuchun kachashka runakunatami charirka, paykunami imashina kay akllari katikuyta rikuk karka: paykunami apuykunata chaskikta, apuchikunata apayta, apuchi killkakta, CNE kamaywasi kipuyta rikurkakuna.
Tukuy chay kachashkakunami chay pachallatak rimashpalla, kamachiywan wanayta churana karka, mana allita rikushpaka utkashpa willana karka. “Chaytami kallari akllaypika ñukanchikka rurarkanchik, shuklla Alianza PAIS llaktay tantarimi shinarkanchik, chaytami CNE achiklla rikuchinata charirka”.
Shinallatak, ista llaktakunamanta 300 rikukkuna chaparka, Mamallaktapak tukuy akllay kuskapi tiyak patakukunapi rikushpa muyurka, ña tukuchishpa “apuchikunata churayka achiklla karka, runakuna apuchishkatami kamarka ”. Chaytami Organización de Estados Americanos (OEA) hatun kamachik, Luis Almagro achikyachishpa willarka, paypash Lenín Moreno mishashkatami tukuykunaman rikuchirka.
Shinami mashi Lenín Moreno akllarishka (51,16%) apuchita charikta chanirka, chayka 5 hunu apuchikuna hawaman rikurirka, shinami misharka, akllarikpuramanta kay 200.000 apuchi karuman rikurirka, Guillermo Lasso (48,84% hawaman rikurirka, 99,71% patsakri pankakunata yupashkaa karka), kay willaykunawan hatun kamachik rikushka llankaykunawan paktana nirka.
KZ/mjc/jc-kichwa
