Kay María Encarnación Duchi, Jaime Olivo, Tito Puanchir, Elio Peña, Edy Peñafiel, Ángel Gende kamachiy killkakkuna de Pachakutik, paykunapak llaktaytantaripak yuyayta mana pakishpa llankashun nirka, tantarishpa llankashun nirka, Ecuador llaktapi kawsak runakunapak munayta ukllashun nirka.
Shinallatak, Elio Peña kamachiy killkak, payka Zamora Chinchipe markamanta kan, pampakunata tuñishpa llakichishka pachamamapak hayñita ukllashun nirka; maypi kullki llankayta runa kuskata ukllana nirka, tawsami kawsayta charik Mamallaktapak hayñita ukllashun, shuwaykuna ama tiyachun achkata ñakarishun nirka, llakta ushayta, Mamallakta kishpiyrishka kachun ukllashun nirka.
Kay Izquierda Democrática llaktay tantariwan shuk kamachiy killkakta charishpapash, Pachakutik llaktay tantaripak uchilla kamachiypi rimashkata mana pakishun nirka, llaktamanta, runakumanata shamuchun llankashun nirka.
Mamallakta Pushak Lenín Moreno, paypak hatun kamahcikkunapak alli llankayta yanpashun nirka, kamachikpak llanka patakunapi kak kamchikkunawan rimanakuyta charinka ñakarishun nirka, kunka llaktay tantarikunawan, runallakta tantarikunawan rimanakuymi yallita mutsurin nirka, Mamallaktapak llakta ushayta charichun tukuykuna llankashun nirka ".
Kamachiy killkak, María Encarnación Duchi, Cañar llaktamanta shamuk, kay llankayta tantarita pushak, uchilla llaktay tantarikunaman kimirishka kashpa Consejo de Administración Legislativa tantariman yaykurichun, shuktak tantarikunawan rimarishka akllashun nirka.
Kay Bloque de Integración Nacional, Izquierda Democrática, Partido Sociedad Patriótica, Movimiento Peninsular Creyendo en Nuestra Gente, FE, Movimiento Tsáchila; Movimiento Unidos por Pastaza,Movimiento Cambio tantarikunwan yuyarishpa shukta akllarka. "Mashipura piñanakushpapash Mamallakta Tantakuypika shukllashinami kana kanchik", nirka.
Kay Marlon Santi, Pachakutik llaktay tantarita pushak, Mamallakta Tantanakuyman yaykurishka sukta kamachiy killkakkuna, llaktakunapak, runakunapak tantaripak, pakllapi kawsakkunapi, 10 watata ñakarimuk llaktayukkunapak, paykunapak hayñita charina mashkakpak shutipi rimayta charishun nirka.
JLVN/pv/jc-kichwa
