Kunan tutamanta Mamallakta Tantanakuypak rimanakuy kallarikukpi, Jaime Olivo kamachiy killkak, atinakuna iñukuna shuktakyachun mañarka, Estados Unidos llaktata, Brasil llaktata Odebrecht hawa willachun mañana nirka.
Chaymantami kaypak shuk yuyarita Mamallakta Tantanakuy charina kan nirka, shinallatak Fiscal General, Carlos Baca kamachik taripayta willankapa shamuchun kayarka.
Kay 58 apuchiwan, 70 mananiwan, shuk shuyaywan, rimaykuna mana shuktayachun mañarka.
Shinapash, José Serrano, Mamallakta Tantanakuyta pushak, ista kamaywasikunata willachun mañanka, shinallatak Fiscal General de la Nación kamachikta kayanka, imachina chay hawa taripaykunata katikushka, kipurikushka kay llaktaman tikramukpi willachun mañanka. Shinami chay llakikuna ashayarishpa katinka, ñukanchikpak Mamallakta kasiyarishpa allita llankanka.
Yalli willay
Kay mañayka Fiscal General, Carlos Baca Mancheno kamachik, chay Brasil Mamallaktapak Procuraduría General kamachikwan tantarikpi, kunan pachami karka, paymi Odebrecht llankaywasi llaki rurashkata taripayta rurachun minkashka kan.
Chay tantaripika Ecuador llaktapak kamachikkunaman kimsa watapi taripashka willayta chayachinami sakirirka. Kay Carlos Baca Manceho kamachik, chay llaktapak mashi kamachikkunawan shuk sayllata, chay Procuraduría wasipi tantarirka.
Pay José Serrano, Olivo kamachiy killkak mañashkata uyashpa, Baca Mancheno kamachik Mamallaktaman tikramukpi, kunankama imalla willay tiyashkata chayachichun mañasha nirka.
MC/pv/jc-kichwa
