Chay Carchi llaktamanta kamachiy killkakkuna René Yandún, Fernando Burbano, Juan Carlos Yar, Javier Cadena chay llaktamanta llankakkunawan, kullkiyachikkunawan tantarirka, ishkaynikipika chay chinchaysuyu llaktapi kawsak runakuna kullki llakita charishkata rimarka.
Ñami kimsa wata dólar kullki urayakpi mintalaykuna urararka. Yallik watakunaka Colombia llaktamanta shamuk runakunami Tulcán llaktapak ñankunapi rantinata huntachik karka, kunanka Ecuador llaktamanta runakuna Ipiales, Pasto kuskakunaman chayan.
Katunakuna wichkarishka, llankaykuna illak, shukktak llankaykunapash illak, Carchi markapak, Tulcán kitipak ñankunapi huntarka, shinami Javier Nastacuaz runa riksichin.
Payka 32 watata killu antawata pushashpa llankan, kunanka llankana pachata patarin, yalli watakuna hapishka kullki chawpitallatapash wasiman mana apanchu: “Kunanka Collombia runakuna mana shamun. Rumichaca kuskaman rik karkanchik, shinapash kutintak hatarinata munanchik”.
Chay Centro de Exposiciones Permanentes de Integración Andina (Cepia) tantaripi, llakita allichinkapa yuyaykunata rantinchirirka. Chay Carchi markapi kawsak runakuna kay rantina, katuna llaki hawa atinakurka, mana llaktay yuyayta charin nirkan.
Mamallakta Tantanakuypi llankana yuyaytami charin: “Shinami tantarishpa, shuklla kipi tukushpa llankanata yuyanchik nirka”, shinami Fernando Burbano rimarka. Kay Turismo, Artesano killkana, Transporte Terrestre kamachiyta, Desarrollo Fronterizo kamachiyta allichina, kay kamachiykuna achkata yanapanka nishpa rimarka.
MC/pv/jc-kichwa
