Mamallakta Tantanakuyta pushakpak ukuman 12h10 sayllata chayarka.
Shinami kay China llaktaman, Tailandia llaktaman punkarata katushpa shuway tiyashka taripayta rikuchinkapa willak Fernando Villavicencio chayarka.
Paypak makipi panka wakaychik folders ukup, taripashka 4 waranka panka ukupi tiyakta, pusak watata taripashka kakta riksichirka.
Imashinami willakkunaman Villavicencio riksichishka shinaka, chay China llaktawan, Tailandia llaktawan, kay llankaytaka Rafael Correa yallik pushakmi, 2009 watamanta churarka.
Shinami ñukanchikpak Mamallaktaman 19 waranka hunu dólar kullkitami manun. Shinallatak Villavicencio willakka,manuka wawa kullkiwan 7 patsakrimanta, 25 % patsakriman chayan, shinami yallik Correa Pushak churashka kamachiypi rikurin, kipaman punkarata katushpa manuta tikrachichun riman, nirka.
Kay rikuchishka pankakunapika 1.200 manka punkarata 2024 watakama katushka kakta rikuchin, katuna ñanka: china llaktaman manumanta kunami rikurin, China llaktapak hatun llankakkunaman katunami rikurin, shinami taripaypika riksichin, shina paktachikpika Mamallaktaman sapan manka punkarapi chusku dólar kullkita chinkan. Sapan puncha 300 waranka punkarata China llaktaman, Tailandia llaktaman puchuta katukpika 2 waranka hunu kullkita chinkanka, shnami Villavicencio riksichirka.
Fiscalía kamachik rimachun shuyan
Kay taripayta Fiscalía General del Estado kamachikman ishkay killa washaman Villavicencio willak chayachirka, shinapash paypak shutita, shuti aspita, kamachiy yachakpak shutita riksichun manarak kayanchu. “Kullkita mana alli llankachishka rikurin.
Kay Mamallaktapak pankakunami rikurin, shuktaka pankakunaka Perú llaktapi rikurishkami kan”, shinami Fernando Villavicencio willarka. Kay kullkikunaka hatun punkara rantikkunapak makiman urmashka kanka nirka, chayaman Ecuador llaktapi kawsak llankak wasiyukkunapash kimirishka kanka, yallik hatun kamachikkuman kimirishka awllikkunapash kay llakita rikunatami charin nirka.
MC/pv/jc-kichwa
