Chay 27 puncha, tutamanta, kulla killa, 2018 watapi, Comando Provincial de Policía wasipi shuk antawapi rumpa ayñi tukyarka, chayka San Lorenzo llaktapimi sakirin.
Chay tukyaymanta 28 runakuna chukririrka, 100 runakuna karpakunapi puñunkapa anchurirka, chay llakimanta 37 wasikuna wakllirishka sakirirka.
Kimsapuncha kipa, hatun kamachikkuna tantarishka kipa, 17 puncha, panchi killapi, shuktak llakta chimpapura sayllamanta waktashkata tikrachirka.
Shinallatak, 19 puncha, panchi killa, El Pan kuskapi ishkaykutin aywan waktarka, chaypi ishkay awkakuna anchata chukririrka, ayllukunapash achkata llakirirka.
Kay llakikunaka mana chaypilla sakirinchu, 22 puncha, panchi killapi, chay Panamericana Sur kuskapi, Chimborazo markapi shuk antawa tukyarka. Kipaman 18 puncha, pawkar killapi, chay El Pan kuskapi ishkay awkakuna chukririshka rikurirka. Shinallatak, 16 puncha, pawkar killapi, Borbón llakta kuchupilla, Armada de Ecuador wasi waktashka karka, shinallatak kayna inti puncha, San Lorenzo-Ibarra llaktapi awkapak antawa waktashka karka, chaypi kimsa awkakuna chukririshka rikurirka.
Kay llakikunami kamachiy killkak Carlos Viteri Gualinga chayachsihka kan, pay Mamallakta Tantanakuyman Defensa Nacional hatun kamachik, Interior hatun kamachik, Relaciones Exteriores hatun kamachik, Vivienda kamachik, Jefe del Comando Conjunto de las Fuerzas Armadas awka kamachik shamuchun nirka, paykuna imashina chay llakikuna rikurishkata willachun nirka, shina Ecuador llakta chay waktaykunata harkachun nirka.
Llakichishkakuna
Kamachiy killkakpak yuyaypika, kay llakikuna makimanta llukshinka, ñami Mamallaktata anchata llakichi kallarin nirka. Ecuador llaktapi kawsak runakunapak tukuy kamayta llakichi kallarin nirka. “Mana yupaypak hatun llakimi tukunka, chay Estado de Excepción kuskakunapimi llakikunaka ashtawan kallarin nirka. Chay takashka allpakunapak kullkitalla mana llakichinchu, tukuy Mamallaktatami llakichin”, Viteri rimarka, kay Quito llaktapi, Guayaquil llaktapi shina llakikuna rikurikpika imashi tukunka, tapurka.
MC/pv/jc-kichwa
