“Ñuka fiscal kamachik kashkamanta mañashkata rikuchinkapa, kallaripika llaktayukshina, kay 11 killata llankashkata ukllankapa shamuni”, Carlos Baca Mancheno, fiscal General hatun kamachik rimarka.
Kipaman, shinami paypak awllita mana paktachishkamanta Mamallakta Tantanakuypi wanachi kallarikpi, mitsarinata kallarishpa rimarka.
Kay kutinka, willana hillaykunapi mana allita willashkamanta, Mamallakta Tantanakuyta kishpiychichun mañarka, mayhan kamachiy killkaktapash mana hamirkanichu nirka.
Paypak rimaypi, chusku patata rikuchirka, kallaripika imashina Comisión de Fiscalización katimushkata, payman shuk takaytalla charin, muyuy killkapi rimashka shuk hucha kan nirka, chaypimi, yallik Mamallakta Tantanakuyta pushak, José Serrano, llukshishka, Carlos Pólit kamachikwan rimanakuyta charishkata willarka.
Kay 11 killapi, chay Fiscalía kamaywasita sinchiyachinkapa mushuk llankaykunata rurashkata riksichirka, ancha kullki shuwayta, kamachiyta pakishpa kullkita yaykuchinata, tantarishpa shuwakta anchuchinkapa taripaykunata rurashkata riksichirka.
Kipaman, Fiscalía kamaywasi paypak ushaywan, Hatun Rikurayak kamaywasikunata mirachirka, shinami 30 waranka wanaykunata chaskirka. “ Chusku Hatun Rikurayak 100 waranka runakunapak wanayta chaskina, pushak Hatun Rikurayakwan chaskina, mana shinallatak kanchu”, rimarka.
Mamallaktapak chincha saywa llakitapash rimarka, chayka “llankay kuyurikunata mushukyachishka” chusku, pichka awkawasi muspachik muyuta kamachiyta pakishpa katuchik karka, kunan katunkapaka yapa mushuk ñankunawan miyuy kapukkunata apan, rakin, katun nirka.
Tukuchinkapa, ña llaktay wanachi arinishka tiyakpika, mayhanpash mana mutsurinchu, Hatun Rikurayak rimashkapash mana mutsurinchu, shinapash ñuka willana kashkata willanimi nirka.
EG-JLVN/pv/jc-kichwa
