Sukta sayllata atinakushpa kipa, 30 kamachiy killkakkuna rimashkawan, kayna tuta Mamallakta Tantanakuy 75 apuchiwan Willay Kamachiyta arinirka.
Manarak kay kamachiyta arinishpa tantarita pushakkunapak, kamaywasikunapak yuyaykunata chaskirka, chaywan mushuk kamachiy killkarishpam Mamallaktapim tiyarin.
Kay kamachiy tukuykuna rimayta charichun yanapanka, Mamakamachiywan, istakamachiykunawan kimirin, willana hayñikunata paktachinka.
Shinami “Mamallaktaman rimayta, willayta tikrachin, willayta killkakkuna paykuna kishpiyrishka rimayta charinka”, shinami Jorge Corozo kamachiy killkak, Comisión de Derechos Colectivos pushak rimarka, paymi kamachiyta atinakuyman apankapa killkata allichirka.
Kay kamachiyka, washa 2013 watapi arinishka kamachiyta rikukpika 76% patsakri allichirirka, shinami Superintendencia de la Información y Comunicación (Supercom) kamaywasi anchurirka, mana allita willashka kipaman kay kamaywasika willakkunata llakichik karka, kamachiywan willaypi takarik ama tiyachun mushukyachirka.
Shinalltak anki, karurikuchik willak larkakunata akllankapa mishanakuyta rurachun killkarirka, chaytaka kay Contraloría rimashka kipami pushanka, yallik watapi tiyak kamachiyka llakikunatami pushamurka. Chaymanta willayka shuk hayñi kachun mañarka, willaykuna llakta ushay kachun tiyachin.
Mushuk kamachiyka willakkunata yachachina, runa ayllullaktapi willana hillaykuna tiyakpika, chaypi llankakkuna sumak yachayta charichun mana mañankachu, chay runakunaka ayllukllaktapi llankaykunamanta, kawsaymanta llukshishka willaykunatami yapa riksichinka.
RSA/ds/jc-KICHWA
