Mamallakta Tantanakuyta pushak, César Litardo Caicedo, kamachiy killkakkunata, 549 yupay hatun tantariman kayarka, 09h30 sayllata tantarinka, chaypimi Transporte Terrestre, Tránsito y Seguridad Vial kamachiyta atinakunka.
Kay kamachiyta, kunan atinakuywanka kimsakutin atinakunka, shinami alli kamachiy killkarinka, antawa allita llankachun yanapanka.
Shinami Fafo Gavilánez, kamachiy killkak rimarka, paymi kay Tránsito kamachiyta allichishpa katimun.
Chaymanta pay ikayashka tantarikuna, kamachiykuna, runakunata, kamaywasikuna chaypi karka, paykunapash mushuk yuyaykunata churarka, chaywan alli kamachiy llukshishpa, runakuna ñankunapi, wañuy, antawakuna sinkuy ama tiyachun harkanka.
Kay kamachiywan antawakuna payayashka, antachaki llampuyashkata, hillaykuna pakirishkata, purichina pankakuna mawkayashka rikunaka. Shinallatak antawa purichik ama machashun, chapakkunata ama takachun, ama yalli kallpachun, runakunata ñankunapi ama manchachichun, ama chukrichichun chapanka. Antawapi purik runakuna allita kamamashka kachun rikunka, Gavilánez shina rimarka.
Kunankama 19 kamachiy killkakkuna yuyayta churashka, paykunaka Comisión Ocasional de Tránsito kamachiyta allichina yuyaywan kimirinakushka, shuklla yuyayta rikuchishka, chaytami llaktayukkuna hapishka rikurin nirka, tukuykuna imashina antawa llankachun yanapana ñanta rurana, antawa purichina yachana wawamanata kimsaniki patakama yachana kachun nirka.
JLVN/eg/jc-kichwa
