Mamallakta Tantanakuy 662 yupay rimakuypi, kamachiy killkakkunapak 104 apuchiwan, 27 shuyay apuchiwan allikawsaypak istamanta kullkita, hampikkunata, hampikunata Mamallakta Pushak mashkachun mañarka.
Chaykama Banco Central kullkiwasipi kullki tiyanmi nichun arinirka, chay kullkiwan hampita rantishpa Covid-19 unkuyta harkachun mañarka.
Istamanta hatun hampikuna, bioquímicos clínicos (laboratoristas) hampikkuna, virólogos hampikkuna, epidemiólogos hampikkuna, hampikta yanapakkuna shamuchun mañarka.
Paykunawan Ecuador llaktamanta hatun unkuyta pichankapa nirka. Shinallatak hampi kipikunata, hampi hillaykunata, Coronavirus unkuy ama hapichun yachaykunata kuchun, llaktayukkunata unkuy mallita rurachun mañarka, chaypi mashna ukushka, mashna uksi kashkata riksirinka, rimarka.
Shinallatak, kay killkashka pankapika Banco Central kullkiwasi, kunan Mamakamachiy rimashkata hapishpa Mamallaktaman kullkita kuchun mañarka, chay kullkiwan hampi llakita, runakunapak llakita, kullki llakita allichinka, rimarka.
Kamachiy killkak Juan Cárdenas, allpapachapak yanapay shamuchun, ñukachik llaktapi unkuy mishakun rimarka, Mamallaktapi tukuy llakikunata allichina nirka. Allpachapi hatun tantarikuna, imashinami: kay Organización de Naciones Unidas, ONU tantanakuy; chay Organización de Estados Americanos, OEA tantanakuy; suyumanta shuktak hatun tantanakuymanta, paykunamanta ista yanapayta charina kanchik, rimarka.
Mamallakta Tantanakuy 10 sayllata atinakushpa kay arinishkata surkushka washa allichishka Alimentación Escolar kamachiyta, Acuicultura y Pesca kamachiyta arinirka, kay kamachiykunata Kamachiy Kipuman killkarichun kachanka, chaymanta llankankapa llukshirinka.
RSA/cz/jc-kichwa
