Kay Comisión de Soberanía y Relaciones Internacionales tantari, chay Ministro de Transporte y Obras Públicas (MTOP), Gabriel Martínez kamachikta chaskirka, payka Mamallaktapak antanka imashina kay Covid-19 unkuy llakipi Mamallaktapi pawakushkata riksichirka.
Kay Martínez kamachik, Dirección General de Aviación Civil (DAC) uku, kamaywasipak ukupi kan nirka.
Ñukanchik Ecuador llaktamanta shuktak ista Mamallaktapi kak runakunata yanapashpa pushamushkata tantaripi kak runakunaman, kamachikkunaman willarka.
Yallik wata 2019, Ecuador llaktaman 390 waranka runakuna shamurka, kay 2020 wata, pawkar killaman 204 waranka runakuna shamurka nishpa willarka, chayka 47 % patsakriman urayashkata rikuchin. Kay ayriwa killa, 2019 watapi, 363 shamurka, kunan 2020 wata, hatun unkuymanta 0 illak, mana shamurka nishpa willarka.
Kay llakimanta Mamallaktapak antanka tiyarina pampakuna 30 hunu kullkita chinkashka nirka, kay llaki llaktakuna wiñarina, kullki mirarina llankayñanta, llankay shamuna wakllichishkata rikuchin nirka. Shinami pawachik llankakwasikunata pakishka chay Tame pawak llankakwasimanta flota Embraer antankakunata katuna nirka, kaypika tawka pawachikkunami llankan nirka.
Mamallaktapi antanka pawashkamantaka Ministro kamachik, DGAC kamaywasimi antanka pawachun kachan nirka, kaypimi mashna antanka pawakta kipun, willarka. Mashna pawakta, mashna runakunapak shutita killkanataka Cancillería o el Ministerio de Relaciones Exteriores kamachikkunami minkashka kan nishpa riksichirka, allpapachapika Consulados, Embajadas istawasikunawan kimirishpa llankan nirka. Shinami kay hatun unkuy kallarishka pachamanta Quito llaktapi, Guayaquil llaktapi kamachikkuna kachashka rikun nirka.
Pawkar killapi, Guayaquil kitipi antanka punku wichkarishkamanta, kay llakiwan Municipio de Guayaquil Hatun Kamachik mana kimirishkatta, willarka. Kay llakimanta Fiscalía kamachik taripachun mañarka, kay Autoridad Municipal antanka pampata hapishka llakitaka Aviación Civil kamaywasimi rikunata charin, nirka.
Tuchinkapa, rimanakuy tantarita pushak, Fernando Flores, ashtawan riksinata munakkunaman llaki rikurishka pankakunata chayachichun mañarka, Ministro del MTOP kamachkikman, Gerencia General de Tame kamachikman, chayachichun mañarka.
EA/cz/jc-kichwa
