Mamallakta Tantanakuy Christian Cruz Larrea kamachikta llankaymanta 124 apuchiwan surkurka, payka Mamakamachiy, Kamachiy mañashkata pakirka.
Chaymanta ñapash Consejo de Participación Ciudadana y Control Social (Cpccs) kamaywasimanta anchurichun mañarka
Shinami Mamallaktapak Mamakamachiypak 131 nikipi riman nirka, shinapash 5 kamachiy killkakkuna shuyashpa sakirka.
Kay Christian Cruz kamachik kimsa sayllata ukllarishpa mitsarirka, payka chay Consejo de Participación Ciudadana y Control Social kamaywasipi alli llankayta rurashkata rikuchirka, kay “E”) tisiku pankata manarak Cpccs ukuman llankankapa yaykurishpa charishkata rikuchirka. Pay charishka tisiku pankaka kamachikkuna kushkamanta allimi kan nirka.
Mama Henry Kronfle, huchachik kamachiy killkak, tisiku pankata yanka hapishkata mana pay mañashkami kan, kamachikkunapak pantayka kaman kanchu nishpa riksichirka, 81% patsakri ñawpa kashpaka mana “E” tisiku pankata charimanchu karka nishpa atirka, kunanpi antawata purichikushpaka mana achka ñawsachu kanka nirka.
Kutin, Noralma Zambrano kamachiy killkakka, kamachiyta pakishpa llankaykunata rurashka Mamallakta Tantanakuypak Cpccs tantari ukupi wakaychishpa tiyakun nirka, panta llankaykunata, arinikunata ruranka uchilla kamachiykunata rurashkata, karwa killa, 10 puncha, 2019 watapi, Christian Cruz kamachik uchilla kamachiyta churashkata rikuchirka, karuman rishpa kullkita hapinkapa 55 punchata llankarka, kipaman ña anchuchirka nishpa atirirka.
Shinallatak, tayta Elio Peña, Comisión de Fiscalización tantari pushak; José Serrano; Mercedes Serrano; Marcelo Simbaña; Dennis Marín; Fernando Flores; Rodrigo Collaguazo; Henry Cucalón; Franklin Samaniego; Esteban Melo; Absalón Campoverde; Jaime Olivo kamachiy killkakkunapash chay Christian Cruz kamachik tawka mana allikunata rurarka, tisiku kashpa churashka kullkita Mamallaktaman mana kurka, mana pay ruranata llankarka, chaymanta wanachishka kana kan nirka.
Llaktay wanachiyta rurashpa Fiscalía General del Estado kamaywasiman wanachishka willayta kachanka, Cruz kamachikpak huchata taripayta ruranka, Contraloría kamachikman mashna kullkita yanka tukuchishkata taripanka, awllik ima mana alli llankaykunata rurashkata taripanka, kipaman huchachinka, wanachinka.
EG/cz/jc-kichwa
