Mamallakta Tantanakuy mushuk llankay Reformatoria a la Ley Orgánica de Emprendimiento e Innovación para la Implementación Efectiva del Emprendimiento Juvenil kamachiy atinakuyta wichkarka, kay kamachiyta Comisión de Desarrollo Económico tantari killkashkami kan.
Tayta, Esteban Albornoz, Tantarita pushak, kay Emprendimiento mushuk llankay kamachiy hawa riksichirka.
Chaymanta 4833 Sociedades de Acción Simplificada llankakwasikunata shayachishkata kamachiy killkakkunaman rikuchirka.
kay mushuk achka llankaykunaka llankayta mirachirka, kullkita mirachirka nishpa willarka, ashtawankarin Economía Popular y Solidaria kullkiwan kimirishpa llankarka nishpa willarka.
Shinami kay Kamachiyka mintalaykunata ñawpakman pushankapa llankayñankunata rurachun, mushuk llankaykunata llaktakunapi, markakunapi, shulkakunapi, kitikunata wiñachichun achkata yanapanka. Shinami paktarunakunaman mushuk llankayta wiñachichun, paypakunapak llankaymanta hapishpa kullkita wiñachichun yanapanka. Achka kullkita hapishpaka Ministerio Rector de la Producción kamaywasipi churanka. .
Kamachiy killkak, Mariano Zambrano, mayhan kay Emprendimiento kamachiyta churak, paypak yuyaypika mushuk llankaykunata llaktakunapi, markakunapi, shulkakunapi, kitikunapi, yunkallaktakunapi, punallaktakunapi mushuk llankayta wiñachichun achkata yanapanka, chaypimi paktarunakuna llankayta charinka nirka.
Shuktak kamachiy killkakkunaka kay Emprendimiento kamachiy Mamallaktapi kawsak runakunaman, pakta runakunaman, warmikunaman allita kamachiy rikurishka, chaymantami Superintendencia de Compañías kamaywasi arinishkawan 5 waranka, Sociedades de Acción Simplificada llankakwasikuna wiñarishkata rikuchirka. Kay llankaykunaman Hatun kamachik kullkita churachun mañarka.
Shuktak churashka yuyaykunaka mushuk llankaykuna wiñarichun yachaykunata churachun mañarka, chaypimi Mamallakta paktarunakunaman yachayta churachun, mintalana llankayñankunata rurachun, kapukyay sapita churachun, mushuk llankakwasikunata shayachichun mañarka.
SV/cz/jc-kichwa
