Llaktakuna tantarishpa Antisuyuman kamachiyta paktachina, Guadalupe Llori Abarca, Mamallakta Tantanakuyta pushak rimarka.
Chay Lago Agrio llakta wiñarishka 42 wata kakpi aknay tiyarka, kayna puncha Acuerdo Legislativo pankata Mamallakta Tantanakuyta pushak kamachikkunaman napayta chayachirka, Mamallakta, markakuna wiñarichun mañarka.
Pay rimashpa Antisuyu llaktakunapak ushushi kani nirka, punkara llankaymanta, runakunapak kawsaymanta llaktapi riksini, Orellana markata, Sucumbíos markata mana kunarina kani, kay llaktakunapak wiñay kawsayta aylluman, churikunaman willana kanchik nirka.
Mamallakta Tantanakuyta pushakka, Ecuador llakta, Antisuyu llakta kunanmi shukkutin shukata wiñaykawsayta charin nirka. Kay hatun kamachikwan Ecuador llaktapi kawsak runakunapura kawsayta takarikuyta washaman sakishpa tantarishpa llankana pacha chayamun nirka, shinami mushuk Mamallaktata charishun, ayllullaktakuna, markakuna paktapakta yanapayta charinka nishpa risichirka.
Pay, Guadalupe Llori hatun kamachikka, Mamallakta Tantanakuypi llankayta pachamamata mana wakllichina llankaymi kanka nirka, pukru waykukuna, mayukuna, antizuyu sachakuna wakllichina llankayta anchuchina kamachiyta churashun rimarka. Yallik kamachikkuna, punkara llankakkunawan yuyarishkata rikushun nirka. Shulkakunaman, kitikunaman, markakunaman alli llankayta rurachun kullkita, allikawsayta, yachayta, llankayta Antisuyuman chayachishun nirka.
Llaktakuna tantarishpa Antisuyupak llakikunata, mutsuykunata allichishun, Antisuyu llaktakuna kamachiyta paktachishun, llankaykuna katikuchun kullkita churashun nirka, kay llaktamanta charimushka ayllukunaman, llaktakunaman chayachun tankashun rimarka.
Tukuylla llankaykunapi, punkara llankaykunapi antisuyumanta yachakkuna 70% ruranuna llankayman yaykurichun mañarka. Shinallatak hatun llankaykunaman Antisuyumanta uchilla, paktalla, hatun llankakwasikunawan llankay yuyarita rurana nirka. Chusku hatun yachanawasikunata rurachun, tukuy Antisuyu llankakkunaman shuk punkara mankata katushpa, mankamanta 2 dólar kullkita kuna kachun mañarka.
Mamallakta Tantanakuyta pushak, paypak katikillataka kunan puncha 11h00 sayllata, Mamallakta Tantanakuy wasi, José Mejía Lequerica hatun ukupi riksichinka, chaypi kamachiy killkakkuna, shuktak kamachikkunapash kanka, shina willarka.
Kayna puncha, Mamallakta Tantanakuyta pushak, Abraham Freire Paz, chay Lago Agrio kitipushakpak makimanta, punku paskanata chaskirka. Kay Sucumbíos llaktaka, hatun kamachikkuna, Antisuyuman alli llankaykunata rurachun shuyan, chaypi yuyayta churashka kanchik nirka.
Kay Lago Agrio kitipushakka, chay Amazónica kamachiyta paktachishpa shulkakunaman, kitikunaman, markakamachikman kullki chayanka, chaywan karu sacha llaktakunapi llankaykuna, allikawsay wiñarinka, kullkipash ayllukunapi tiyarinka nishpa willarka.
JLVN/pv/jc-kichwa
